Ambasada e SHBA është e para që reagon pas heqjes së mandateve të dy deputetëve Selami dhe Tahiri si dhe kryebashkiakut Elvis Rroshi. Vetëm pak minuta pas vendimit të KQZ-së, ambasada shkruan se kjo është një fitore për popullin shqiptar.
Deklarata e plotë
“Ambasada e Shteteve të Bashkuara mirëpret vendimin e Komisionit Qëndror të Zgjedhjeve dhe kërkesën e Prokurorit të Përgjithshëm për t’i hequr mandatet tre politikanëve, Elvis Rroshit, Shkëlqim Selamit, dhe Dashamir Tahirit, nën ligjin e dekriminalizimit. Vendimi i sotëm është një fitore për popullin shqiptar dhe një paralajmërim për kriminelët që po mendojnë a të jenë kandidatë në zgjedhjet parlamentare të 18 qershorit. Zyrtarët e zgjedhur apo të emëruar që plotësojnë deklarata false duhet të ndëshkohen më gjithë forcën e ligjit. Personat me dosje penale nuk mund të kenë vend në përfaqësimin e shqiptarëve”, thuhet në postimin e SHBA-së në facebook.
