Kreu i shtetit, Bujar Nishani, mblodhi dje në Presidencë Këshillin e Sigurisë Kombëtare për të diskutuar dhe koordinuar politikat mbi luftën kundër kultivimit dhe trafikimit të kanabisit.
Pjesë e mbledhjes me dyer të mbyllura, që nisi në orën 18:15 të mbrëmjes, ishte kryetari i Kuvendit, Ilir Meta, zv.kryeministri Niko Peleshi, ministri i Brendshëm, Saimir Tahiri, ministri i Drejtësisë, Ylli Manjani, ministrja e Mbrojtjes, Mimi Kodheli, ministri i Financave, Arben Ahmetaj, kryeprokurori Adriatik Llalla, kreu i SHISH, Visho Ajazi Lika, drejtori i Përgjithshëm i Policisë, Haki Çako dhe kreu i Komisionit të Sigurisë, Spartak Braho.
Sipas një njoftimi të shpërndarë nga Presidenca, Këshilli i Sigurisë Kombëtare nënvizoi shqetësimin se fenomeni i përhapur i kultivimit dhe trafikimit të lëndëve narkotike përbën një aktivitet të rëndë kriminal me tendencë kriminalizimin e shoqërisë dhe me ndikim negativ në ekonominë e vendit. Gjatë takimit u theksua se një fenomen i tillë korrupton shoqërinë, dëmton shëndetin e qytetarëve dhe cenon imazhin e vendit në arenën ndërkombëtare.
DISKUTIMI
Gjatë takimit me dyer të mbyllura lidhur me situatën e kanabisit në vend, por edhe mbi angazhimin institucional të qeverisë për luftimin e një fenomeni të tillë, mësohet të kenë folur ministri i Brendshëm, Saimir Tahiri, drejtori i Policisë së Shtetit, Haki Çako dhe kreu i SHISH, Visho Ajazi Lika.
Gjatë takimit zv.kryeministri Niko Peleshi ka theksuar se në janar të vitit 2017 qeveria do të ketë gati strategjinë kundër kultivimit dhe trafikimit të kanabisit në vend. Njoftimi i Presidencës sqaron gjithashtu se gjatë mbledhjes së Këshillit të Sigurisë u theksua domosdoshmëria për forcimin e bashkëpunimit ndërinstitucional, si dhe rritja e bashkëpunimit efikas me agjencitë dhe institucionet partnere ndërkombëtare që operojnë në këtë fushë.
“U evidentua rëndësia që ka trajtimi i kësaj çështjeje në frymën e angazhimit konsensual dhe me realizëm, duke përfshirë edhe masa të rrepta për goditjen e elementëve të inkriminuar që kanë arritur të penetrojnë në organet ligjzbatuese”, sqaron zyra e Presidencës.
PËRPLASJA
Për Presidentin Nishani, krijimi i një Task-Force nga qeveria për të luftuar kultivimin dhe trafikimin e lëndëve narkotike është tregues i përmasave që ka marrë ky fenomen në vend, raporton “Panorama”.
“Mirëpres kontributet konstruktive të përcjella në këtë takim, duke vlerësuar se Task-Forca e ngritur nga ekzekutivi me qëllim arritjen e një bashkëpunimi ndërinstitucional më të suksesshëm operacional vërteton përmasën e këtij fenomeni në vend, ashtu si edhe nevojën për ta luftuar atë më me vendosmëri dhe efikasitet”, ka deklaruar Nishani gjatë takimit.
Por zv.kryeministri Niko Peleshi në fund të mbledhjes së Këshillit kërkoi që, kur të flitet për luftën kundër kanabisit në vend, aktorët politikë t’u referohen shifrave dhe jo perceptimeve. Gjithashtu, numri dy i qeverisë e konsideroi të vonuar thirrjen e një mbledhjeje të tillë nga Presidenti Nishani.
“Është tryezë e vonuar, por më mirë vonë se kurrë. E vonuar sepse policia i ka dhënë tashmë rezultatet e veta, qeveria së bashku me partnerët tanë ndërkombëtarë ka konsoliduar platformën për ta çuar në një fazë vendimtare këtë luftë. Por sa më shumë të mblidhemi, aq më mirë është dhe aq më shumë do t’i çojmë institucionet e tjera jo vetëm qeverinë, në një ulli të duhur në zbatimin e ligjit dhe jo në zbatim të asaj çka jep mesazhe, partia së cilës i përkasin apo perceptimi publik. Shifrat janë aty të certifikuara nga partnerët ndërkombëtarë, është mirë të bazohemi në to dhe jo të fryjmë tullumbacen e perceptimit publik, e cila dëmton imazhin e vendit tonë, por edhe inkurajon në njëfarë mënyrë kultivuesit dhe ata që kanë rënë pre e kësaj veprimtarie kriminale”, tha Peleshi./J.Mustafaraj/ Panorama
