Mbi 300 forca të policisë janë angazhuar ditën e sotme në një super aksion anti-kanabis që është shtrirë pothuajse në gjithë territorin e vendin, nga jugu në veri. Kjo lëvizje vjen menjëherë pas kapjes së sasisë prej 1.3 tonësh kanabis sativa e tharë dhe e bërë gati për tu tregtuar.
Më konkretisht aksioni është përqendruar përgjatë zonave të Dukagjinit, Lumit të Vlorës, Kurveledhit dhe Memaliaj. Është mësuar se policia e Shkodrës është lënë jashtë operacionit nga frika e dekonspirimit, ndërkohë që në zonë janë duke vepruar vetëm Forcat e Ndërhyrjes së Shpejtë.
Këto janë rezultatet e para nga operacioni i sotëm:
Gjirokastër– Policia në Gjirokastër ka zbuluar 400 kg kanabis të thatë dhe në përpunim e sipër, gati për tu hedhur në treg. Sasia është kapur gjatë operacionit që shtrihej në Memaliaj, Kurvelesh dhe Përmet. Dyshohet se disa nga kultivuesit mund të jenë fshehur në pyjet e zonës.
Vlorë– Policia e Vlorës ka sekuestruar në një pallat në ndërtim e sipër në zonën e Ujit të Ftohtë, 50 kg kanabis sativa. Në pranga është vendosur ndërtuesi, Ferdinant Mile. Gjithashtu në Kallarat dhe Mesapik janë arrestuar 4 persona dhe janë gjetur sasi të konsiderueshme kanabisi në disa magazina.
Mallakastër– Burime nga policia bëjnë me dije së në banesën Kleend Zeqaj në fshatin Dukas në Mallakastër janë sekuestruar 3.7 kg kanabis sativa si dhe është prangosur poseduesi.
Krujë– Policia ka zbuluar një magazinë që përdorej për tharjen e bimës së mbledhur në Nikel të Krujës. Gjatë mbrëmjes së djeshme janë sekuestruar 85 kg kanabis ndërkohë që janë prangosur 2 persona.
