Miklovan Parubi u arrestua nga policia mesditën e djeshme, pasi kreu një masakër të vertetë ndaj bashkëfshatarëve me të cilët po pinte deri pak momente para ngjarjes. Ai nuk ka dhënë asnjë dëshmi konkrete gjatë mbrëmjes së djeshme. E vetmja që gjë që citon, thonë burimet, është se viktimat ia kishin bërë për borxh.
“Ma bënë borxh. Më kanë ngacmuar dhe nuk i duroja dot”, është shprehur ai para hetuesve që e kanë marrë në pyetje në policinë e Shkodrës.
Gjithashtu ai ka thënë se ka patur qëllim të vrasë dy vëllezërit Gacalin dhe Vinçens Kopshtin si dhe Ndok Markun. Ndërsa pronari i lokalit, Arjet Saiti është vrarë në tentativë për ta ndaluar agresorin.
Bazuar në dëshmitë e të mbijetuarve dhe pamjeve të kamerave të sigurisë, policia ka zbardhur skenën e krimit. Autori ka qenë në lokal mbrëmjen e së hënës, duke zhvilluar një lojë pokeri me shoqërinë e tij.
Në një moment, në lojë e sipër ai është çuar dhe ndërsa ka bërë shenjë me duar i irrituar, është larguar nga lokali dhe ka marrë një armë automatike.
“A e dini se ju vras?!”, i është drejtuar ai tavolinës ku ndodheshin bashkëfshatarët e tij. Të pranishmit mësohet se kanë qeshur, pasi nuk e mendonin se çfarë do të ndodhte, por edhe për faktin se shpeshherë e kishin parë autorin të lëvizte i armatosur.
Njëri prej tyre, dyshohet Gacalin Kopshti, i është drejtuar me fjalët: “Çfarë të kemi bërë që do të na vrasësh?”, por pa e mbyllur fjalinë, autori e ka qëlluar, duke i shkaktuar vdekjen.
Kur dëgjoi të shtënat, Arjet Saiti i është afruar Parubit, duke tentuar që t’ia marrë armën nga duart. Në atë moment 33-vjeçari ka qëlluar ndaj Saitit, duke e lënë të vdekur në vend. Plumbat e tjerë i ka lëshuar kuturu, duke plagosur personat e tjerë të pranishëm.
Pas krimit, autori është larguar, duke u ndihmuar nga një tjetër banor i zonës, Marçel Shpijati. Ky i fundit, sipas burimeve nga vendngjarja, e ka ndihmuar autorin për të gjetur armën kallashnikov me të cilën më pas ka kryer edhe krimin e rëndë duke qëlluar mbi shokët e tij.
Miklovan Parubi nuk ka treguar pendesë për ngjarjen. Ai ka thënë se i vinte keq për tre të tjerët. “Më vjen keq për të tjerët. Unë u thashë të ndaheshin veçmas, por ata nuk dolën nga lokali dhe unë i qëllova”, ka deklaruar ai. Nga ana e grupit hetimor deklarohet se do të ketë një tjetër seancë pyetjesh për autorin, për të marrë një dëshmi të plotë.
