Miklovan Parubi personi që qëlloi me breshëri automatiku në lokal duke marrë dy jetë dhe duke plagosur 4 të tjerë është ende në kërkim policor. Por, gjatë hetimeve kanë dalë të dhëna të tjera. Autori nuk ka vepruar i vetëm. Një person është arrestuar për bashkëpunim në krimin e rëndë që ndodhi mbrëmjen e së hënës në fshatin Dajç të Shkodrës.
33 vjeçari Miklovan Parubi, i njohur si përdorues droge është ndihmuar nga Marçel Shipijati 30-vjeç. Policia dyshon se ky i fundit i ka gjetur armën e krimit Miklovanit dhe më pas e ka ndihmuar të largohet me makinë nga vendi i ngjarjes.
Nga të dhënat e deritanishme thuhet se autori është konfliktuar me Ndok Markun, 35 vjeç, që mbeti i plagosur në këtë ngjarje.
Sherri banal ka lindur për një lojë bizhozi. Autori është larguar nga lokali dhe është kthyer pas disa minutash me automatik në krahë duke lëshuar breshëri plumbash mbi personat e ulur në tavolina. Ai ka lënë të vrarë Gacalin Kopshtin 30 vjeç si dhe pronarin e lokalit 42-vjeçarin, Arjet Saiti. Të plagasor kanë mbetur Ndok Marku (shenjestra), Vinçens Kopshti, Aleks Prendi dhe Kitas Molla.
Policia ka vënë në dispozicion edhe një shpërblim prej 500.000 lekësh të reja ose 5 milionë të vjetra për çdo person që inform mbi vendndodhjen e Miklovan Parubit (personi ne foto).
