Një lojë pokeri dyshohet se ka qenë molla e sherrit që çoi në një masakër të vertetë në Dajç të Shkodrës. Humbja në lojë pokeri dyshohet se ka qenë shkaku që çoi autorin 33-vjeçar, Miklovan Parubi në vrasjen e 2 personave dhe plagosjen e 4 të tjerëve.
Si pasojë e të shtënave kanë humbur jetën, Arjet Saiti, 42 vjeç dhe Gacalin Kopshti, 30 vjeç; ndërsa 4 të tjerë kanë mbetur të plagosur rëndë. Ngjarja ndodhi rreth orës 22:40 të mbrëmjes së të hënës në një lokal në një kryqëzimin e Dajçit.
Katër të plagosurit janë Ndok Marku, Vinçens Kopshti, Aleks Prendi dhe Kitas Molla, të cilët janë transportuar menjëherë për në spitalin rajonal të Shkodrës ku i janë nënshtruar ndërhyrjes kirurgjikale.
Sipas policisë së Shkodër, autori i ngjarjes, Miklovan Parubi, njihej në zonë si përdorues i lëndëve narkotike dhe probleme emocionale të pakontrolluara.
Ndërkaq, policia është vënë në kërkim të tij. Janë ngritur pika kontrolli, si dhe po bëhet krehja e zonës në bashkëpunim me F.N.Sh-në me qëllim kapjen e tij dhe vendosjen para përgjegjësisë penale.
DEKLARATA E POLICISË SË SHKODRËS
Me datë 03.10.2016, rreth orës 22: 40, është marrë njoftim se në një lokal tek kryqëzimi i Dajçit, Shkodër, ka të shtëna me armë zjarri.
Menjëherë në vendngjarje kanë mbërritur shërbimet policore që kanë konstatuar se pas një konflikti për motive të dobëta (dyshohet gjatë një loje pokeri), shtetasi Miklovan Parubi, 33 vjeç, ka vrarë me armë zjarri shtetasit Arjet Saiti 42 vjeç dhe Gacalin Kopshti, 30 vjeç.
Gjithashtu ka plagosur edhe shtetasit A.P. 42 vjeç, N.M. 35 vjeç, V.K.22 vjeç dhe K.M. 26 vjeç, të cilët janë transportuar në spital për ndihmën e nevojshme mjekësore ku ndodhen jashtë rrezikut për jetën.
Ky shtetas njihet në zonë si përdorues i lëndëve narkotike dhe probleme emocionale të pakontrolluara. Janë ngritur pika kontrolli, si dhe po bëhet krehja e zonës në bashkëpunim me F.N.Sh-në me qëllim kapjen e tij dhe vendosjen para përgjegjësisë penale.
Grupi hetimor në vendngjarje vazhdon veprimet hetimore për zbardhjen e plotë të ngjarjes. Të gjitha shërbimet e komisariatit dhe drejtorisë vendore të policisë Shkodër janë në gatishmëri bashkë me forcat FNSH në ndjekje të autorit.
*Në foto autori i krimit të rëndë Miklovan Parubi
