Shënim nga *Dritan Laci
Ben Blushi do të krijojë parti të re. Një parti që pritej prej shumë kohësh dhe që është e 100-ta, 200-ta apo e 500-ta që krijohet në këto 25 vite pluralizëm partiak në Shqipëri. Një parti që tashmë i deklasuari apo i vetë deklasuari nga Partia Socialiste mendon ta bëjë ndryshe nga ajo mëmë. Por që është e 10-ta apo e 15-ta bijë e Partisë Socialiste ku i vetmi “abort”që rezultoi më pas një lindje e sukseshme është ajo e LSI-së, partia që siç thonë në popull nuk njeh opozitë. Pasi ikanakët e tjerë që polli Partia Socialiste ndër vite nuk krijuan asgjë më shumë se një parti më shumë ku shpejt kuptuan që pa PS-në ishin të humbur politisht, duke u kthyer shpejt në vagonët e vegjël të trenit Mavi.
Një parti më shumë apo një parti që do të sjellë risi në të bërit politikë në Shqipëri?
Kjo është edhe një nga pikëpyetjet që mundon tashmë ata që shikojnë një fije shpresë te Ben Blushi.
A do të bëjë Beni atë që mendon dhe ka thënë se e kishte gabim Edi?
Apo edhe Beni një ditë nuk do bëjë asgjë më shumë se sa do të kuptojë se pa partinë mëmë ai dhe partia e tij do të jenë të pafuqishme të mbijetojnë në pazarin e vështirë të politikës shqiptare?
A do të arrijë Beni ti përmbahet zotimeve për rikthimin e vlerave demokratike, në një vend ku korrupsioni, klientelizimi, varfëria, arroganca e pushtetit ndaj qytetarit, të bashkuara bashkë, e kanë bërë të pamundur funksionimin normal të demokracisë?
Apo edhe Beni do të jetë një Ben më shumë në atë politikën shqiptare që ai aq po fort po lufton për ta ndryshuar?
A do të arrijë Beni ti rezistojë tundimit të pushtetit edhe pse pushteti punon kundra interesave të qytetarëve?
Apo edhe Beni do të jetë një vagon më shumë votash në trenin e drejtuar nga PS?
Cfarë do bëjë ndryshe Beni tani që do të jetë jashtë Partisë Socialiste?
A do të hyjë ai i vetëm në vallen elektorale, apo do të kemi një bashkëpunim të papritur paraelektoral?
Cilat do të jenë marrëdhëniet e partisë së tij me Partinë Mëmë, Ilir Metën dhe Lulzim Bashën?
Kush do të jenë ata që do ti bashkohen Benit në rrugëtimin e tij?
Do ricikloj kostume të vjetra nga Partia Mënë, apo do veshë një kostum të ri me figura të reja?
Kush është ajo pjesë e elektoratit që do ti besojë Blushit dhe si do të mbijetojë Blushi kundër një sistemi që blen dhe shet vota?
Shkurt: Nëse Beni te filmi i babait kineast mësoi të ecë pa ndihmën e Xha Thomait, A do të mësojë Beni të ecë vetë këtë radhë pa ndihmën e PS-së….
*Dritan Laci gazetar në “Opinion”
