Vazhdon maratona e bisedimeve midis Prishtinës dhe Beogradit për zbatimin e marrëveshjes së telekomunikacionit në Bruksel. Edhe pse sipas axhendës ishte parashikuar që ky raund i dialogut të vazhdonte deri të mërkurën, Serbia ka kushtëzuar kodin telefonik me dy kërkesa dhe për pasojë, bisedimet do të vazhdojnë deri në ditën e pestë pa asnjë rezultat.
Ministrja për Dialog e Kosovës, Edita Tahiri tha se nuk do të ketë asnjë marrëveshje deri sa Serbia të tërhiqet nga kërkesat e saj.
“Po vazhdojmë me bisedimet. Ne nuk i pranojmë kërkesat e palës serbe, gjithashtu këto kërkesa janë jashtë marrëveshjes për Telekomin.” tha Tahiri.
Gjithashtu Tahiri nuk dha informacion nëse zyrtarë të Bashkimit Evropian kanë biseduar me palën serbe për arrestimin e Drejtorit të Policisë së Mitrovicës, Nehat Thaqit.
Dy kërkesat suprizë të Serbisë janë: Dega e Telekomit të Serbisë të ketë shtrirje në gjithë Kosovën dhe që asaj t’i lihen asetet e Telekomit të Kosovës, që serbët i mbajnë të uzurpuara prej pasluftës.
Bisedimet janë koncentruar edhe në detaje të rëndësishme teknike, siç janë stacionet bazë dhe frekuencat në Kosovë, që kanë të bëjnë me mbulimin e zonave të banuara me serbë, me sinjal të kompanisë telefonike serbe.
