Futbolli anglez është në zi pas vdekjes së ish-mbrojtësit të Hull Sitit, Daniel Uilkinson. 26-vjeçari ndërroi jetë në spital pas një ataku kardiak në fushë të hënën mbrëma.
Uilkinson ishte duke luajtur për ekipin Shou Lejn AFC kundër Brajthaus Taunit në ligat e poshtme, kur u shtri në fushë gjatë pjesës së dytë.
Atij iu dha ndihma e parë nga mjekët për më shumë se gjysmë ore, para se të dërgohej me ambulancë në një spital të Halifaksit. Por 26 vjeçari nuk mbijetoi dhe klubi i tij e bëri të ditur lajmin e hidhur me një deklaratë sot në mëngjes: “Me hidhërim të thellë njoftojmë ndarjen tragjike nga jeta të Daniel Uilkinsonit, i cili u shua pas një ataku kardiak në fushë gjatë ndeshjes së mbrëmshme. Mendimet dhe lutjet tona shkojnë për familjen dhe miqtë e tij. Klubi falënderon të gjithë për mesazhet e ngushëllimit që kemi marrë gjatë natës. Fjalët janë të tepërta në këto çaste”. Daniel Uilkinson nënshkroi kontratë profesionisti me Hullin në vitin 2010, pas disa sezonesh me ekipet e të rinjve të “Tigrave”. Për vdekjen e mbrojtësit, klubi i Premier Ligës postoi këtë mesazh në “Twitter”: “Të gjithë te Hull Siti janë të trishtuar për ndarjen nga jeta të ish-lojtarit tonë Daniel Uilkinson mbrëmë”.
