Kandidati republikan për president të SHBA-së, Donald Trump edhe njëherë ka bërë lëvdata për presidentin rus, Vladimir Putin. Trump ka deklaruar se ai (Putin) është lider më i mirë se presidenti amerikan, Barack Obama.
“Putin është shumë lider. Putin ka kontroll të fortë mbi shtetin e tij. Është një sistem ndryshe dhe mua nuk më pëlqen një sistem i tillë. Por sigurisht, në atë sistem, ai është lider, më shumë lider se sa është presidenti ynë”, ka thënë Trump, gjatë një forumi presidencial në televizionin NBC.
I pyetur se, nëse ai do të përmirësonte marrëdhëniet në mes të SHBA-së dhe Rusisë, Trump ka thënë se: “Unë do të kem një marrëdhënie shumë të mirë me Putin dhe mendoj se do të kemi një marrëdhënie shumë shumë të mirë me Rusinë”./tvklan.al
