Rrogat e gjyqtarëve dhe prokurorëve që do t’i mbijetojnë reformës në drejtësi nuk do të jenë aq të larta sa ishte planifikuar në fillim.
Pas shqetësimit të shprehur nga Ministria e Financave në një shkresë të adresuar Komisionit të Posaçëm të Parlamentit, ky i fundit duket se ka ndryshuar qendrim.
Një grup ekspertësh është ngritur për të trajtuar këtë çështje, ku përveç atyre të misioneve ndërkombëtare Euralius dhe Opdat, ka edhe përfaqësues të dikasterit të financave.
Reforma në Drejtësi, në p/ligjin për statusin e prokurorit dhe gjyqtarit, kishte parashikuar një rritje të konsiderueshme të pagave të tyre. Këto rritje shkonin deri në 160% mbi pagat aktuale, duke bërë që një prokuror i thjeshtë të merrte gati 3 milionë lekë të vjetra në muaj, ndërsa paga më e lartë për gjyqtarët parashikohej të shkonte deri në 4.5 milionë lekë të vjetra.
Këto shifra Ministria e Financave i ka konsideruar të papërballueshme për buxhetin e shtetit ndaj dhe i ka kërkuar Komisionit të Reformës në Drejtësi që t’i rishkojë ato. Aktualisht grupi i ekspertëve është ende në fazë negociatash por mësohet se më shumë gjasa rritja nuk ta kalojë pragun e 100%.
ABC News mësoi se probabiliteti më i madh është që kjo rritje e pagave të ndalet në nivelin e 90% mbi rrogën aktuale, ndonëse shifra në fjalë është ende në negociata.
Ministria e Financave, nga njëra anë kërkon të reduktojë koston në buxhet, ndërsa hartuesit e reformës synojnë që rritja të jetë sa më e konsiderueshme për dy arsye.
E para, mendohet se sa më e lartë të jetë rroga aq më pak shanse ka që një gjyqtar apo prokuror të përfshihet në akte korruptive. Nga ana tjetër, prokurorët dhe gjyqtarët antikorrupsion duhet të pranojnë përgjimin e të gjitha komunikimeve të tyre elektronike, përfshi ato me familjarët.
