Kamerat e sigurisë të vendosura në landfillin e Sharrës kanë zbuluar gënjeshtrat e punonjësve të firmës “3R”. Pas ngjarjes, ata u munduan që të devijonin hetimet, duke pohuar se Arditi nuk ishte punonjës. Madje, pretenduan se kufoma ishte sjellë në landfill nga mjetet që mbledhin plehra. Por, prokuroria ka marrë prova se 17-vjeçari ishte i punësuar në të zezë në këtë firmë. Ai ka qenë duke mbledhur plehra, kur një mjet e ka shtypur, duke i sjellë vdekjen.
Burime nga prokuroria pohojnë se janë dërguar për ekzaminim kamerat e sigurisë së landfillit të Sharrës, për të identifikuar 17 vjeçarin Ardit Gjoklaj duke punuar. Prokuroria e Tiranës ka sekuestruar kamerat e sigurisë së vendgrumbullimit dhe selektimit të mbeturinave në Sharrë. Këto pamje, janë dërguar në laboratorin e policisë shkencore për ekzaminim, ku është kërkuar të bëhet këqyrja dhe evidentimi i të gjithë personelit të pranishëm në landfillin e Sharrës. Sipas hetuesve, pritet që ekspertët e policisë shkencore të përshkruajnë me detaje të gjitha lëvizjet e fiksuara nga kamerat e sigurisë nga mëngjesi i datës 6 gusht deri pasditën e datës 7 gushtit, kohë kur edhe janë kryer veprimet e policisë pas gjetjes së trupit të 17 vjeçarit Ardit Gjoklaj.
Nga ana tjeter, përkundër deklarimeve të personave përgjegjës në kompaninë “3R”, sipas të cilëve Ardit Gjoklaj nuk ishte pjesë e stafit punonjës të rekrutuar për të punuar në landfillin e Sharrës, prokuroria ka siguruar disa dëshmi që provojnë punësimin e të riut. Nga ana tjetër, avokatët e të proceduarve penalisht për këtë ngjarje, mësohet se i kanë kërkuar prokurorisë të marrin në pyetje disa dëshmitar, emrat e të cilëve nuk bëhen të ditur. Në mesin e dëshmitarëve, mësohet se janë edhe punonjësit e turnit që ishin në landfillin e Sharrës natën e ngjarjes.
