Një 35-vjeçar nga Elbasani ka rezultuar i prekur nga malarja. Rreth një javë më parë, ai është paraqitur në pavionin e Infektivit në QSUT me temperaturë të lartë, ethe dhe të vjella.
Nisur nga simptomat e shfaqura dhe kontrollet e kryera, mjekët kanë dalë në përfundimin se 35-vjeçari ishte i prekur nga malaria.
Mjeku infeksionist Arjan Harxhi shprehet se pacienti ka qëndruar për gati një javë në spital ku ka marrë mjekim. “Po, ka qenë një rast. Pacienti në fjalë ka marrë të plotë ciklin e mjekimit. Për 6 ditë ka qëndruar i shtruar, dhe të hënën ka mundur të lërë ambientet e spitalit. Mjekimi shkoi shumë mirë dhe pacienti e ka tejkaluar rrezikun për jetën”, tha Harxhi.
Ai e ka marrë malarian në Greqi dhe ky është rasti i katërt që importohet nga vendi fqinj. “Greqia së fundmi është futur në hartën e vendeve ku malaria është shfaqur aty dhe nuk është importuar. Ky është rasti i katërt i prekur nga malaria në këtë vend. Kjo për disa arsye, siç mund të jenë ndryshimi i klimës, numri në rritje i emigrantëve, si edhe prania e mushkonjës që bën transmetimin e sëmundjes”, bën me dije mjeku infeksionist.
