Përmes një deklarate për mediat, Partia Demokratike ka kërkuar nga Kryeministri i vendit të ushtrojë përgjegjësinë e tij për vdekjen e 29-vjeçarit Pëllumb Marnikolli bë burgjet greke. Sekretarja për Marrëdhëniet me Publikun, Grida Duma është shprehur se transparenca dhe drejtësia për këtë rast, do të ishte një kontribut për marrëdhëniet mes dy vendeve.
“Dëshmitë e familjarëve të Pëllumb Marnikollit janë tronditëse dhe ata faktojnë se njeriu i tyre është paraqitur me 3 gusht në një komisariat policie në Greqi, dhe prej andej ka dalë i vdekur. Kjo është një ngjarje e rëndë që meriton drejtësi dhe ndëshkim shembullor për cdo përgjegjës për vdekjen e 29 -vjeçarit shqiptar. Dyshimet janë se ndaj të riut shqiptar është ushtruar dhunë. Dhe nëse kjo vërtetohet, ky është një rast i përsëritur i trajtimit cnjerëzor të shqiptarëve në qelitë greke, në kundërshtim me çdo normë ndërkombëtare të të drejtave të njeriut”, tha Duma. Sipas saj, tranparenca dhe drejtësia për këtë rast do të ishte edhe një kontribut në marrëdhëniet mes dy vendeve.
“Dhe kjo është më së pari detyrë e përgjegjësi e kryeministrit. Ne i kërkojmë Edi Ramës, i cili e ka përcjellë me heshtje këtë rast, që të ushtrojë detyrën e tij, dhe të kërkojë nga aurotitetet greke hetim të plotë të rastit dhe vënien para drejtësisë të përgjegjësve për vdekjen e Pëllumb Marnikollit”, përfundoi deklaratën e saj Duma.
