Grabitja e parave në aeroportin e Rinasit është kthyer në qendër të debatit parlamentar. Ish-Kryeministri Berisha foli për shuma parash tepër më të mëdha se ato të deklaruara nga autoritetet, duke akuzuar qeverinë si të përfshirë në këtë ngjarje. Erion Braçe replikoi me Berishën, duke thënë se kontrata koncensionare e ka fajin, pasi iu la siguria e Rinasit një private dhe jo Policisë së Shtetit.
Ish-kryeministri shtoi dozat e akuzave dhe shkoi përtej ngjarjes së fundit, duke aluduar për një bashkëpunim mes qeverisë dhe kompanive private të sigurimit të bankave në grabitjen e shumave të konsiderueshme gjatë viteve të fundit. Akuzë kjo që detyroi Erion Braçen të kërkojë ndërhyrjen e Guvernatorit të Bankës së Shqipërisë.
Ministri i Brendshëm, Saimir Tahiri, ishte prezent në sallë e Parlamentit gjatë këtij debati por nuk ndërhyri.
