E përditshmja britanike, “The Telegraph” ka publikuar një reportazh mbi mashtrimin e Shoqatave të Pajtimit të Gjaqeve, për arsye lehtësish në emigracion.
Gazetari Peter Foster është nisur nga të dhënat mbi numrin e kërkesave për azil, si shkak i gjakmarrjes dhe deklaratat e ambasadorit britanik në Tiranë, Nicholas Cannon, për atë që diplomati e ka cilësuar si biznes me certifikatat e gjakmarrjes.
Në reportazhin e tij gazetari Foster thotë se kreu i njërës prej zyrave që merren me pajtimin e gjaqeve, Gjin Marku, është hetuar për të tilla certifikata false, por ka dalë i pafajshëm.
Vetë Marku thotë se akuzat ndaj tij ishin të motivuara politikisht, ndërsa sulmon ambasadorin: “Ai nuk di të gjejë as bishtin e një gomari”.
Gazetari ka udhëtuar drejt Shkodrës, ku ka takuar Gjon Mhillin, 34 vjeç. Vëllai i tij ka vrarë një njeri në vitin 1992 dhe tani familja e tij është e ngujuar dhe me pak shpresa për të dalë nga kjo situatë.
Por gazetari sjell rastin e këtij pensionisti, Bajram Cani, i cili kërkon të shkojë në Gjermani me bashkëshorten, por më parë, edhe pse pranon se nuk është në rrezik për jetën, kërkon një certifikatë nga Gjin Marku, duke shpresuar se do ta ketë më të lehtë çështjen e azilit.
Pa e ditur se Cani ka folur më parë me gazetarët, Gjin Marku thotë se do ta pajisë atë me certifikatë, sepse i rrezikohet jeta dhe se gjakësit kërkojnë ta vrasin.
Tv Klan
