Pas dështimit të papritur në “Vicente Calderon” kundër Atletico Madrid, Barça e ka thelluar zhgënjimin e saj. Ajo që ndodhi nuk zhbëhet, por është momenti për analiza. Pse ekipi nuk ka reaguar? Pse ekipi ishte përsëri i pafuqishëm? Këtu janë disa nga “çelësat”, që e çuan Barcelonën drejt eliminimit nga Liga e Kampioneve.
MSN i zhdukur
Ekipi i Barcelonës, i drejtuar nga Luis Enrique, ishte duke iu dorëzuar “tridentit” të vet. Luis Enrique duket se i kishte varur shpresat te Messi, Neymar dhe Luis Suarez, por “MSN” i ranë bateritë në momentin më vendimtar të sezonit. Messi, i topitur, luajti larg nga zona kundërshtare dhe ishte i vonuar për pozicionin e tij, që të bëhej partner me Iniesta. Neymar ishte larg të gjitha ndeshjeve të tjera të këtij sezoni, ndërsa Suarez u mundua dëshpërimisht të shpëtonte nga “dara” e fortë e mbrojtjes kundërshtare, por herë nuk mundi ta gjente rrugën e golit.
Mbrojtje jo e denjë për Ligën e Kampionëve
Një ekip, me një mbrojtje të tillë, të rrezikuar çdo çast, nuk mund të fitojë një Champions. Loja tregoi se Atletico Madrid mund të kishte bërë më shumë dëme për Barcelonën, nëse, pas epërsisë 1-0, të mos kishte vazhduar shtrëngimin në prapavijë. Barazimi kundër Villarrealit, humbja në “El Classico” dhe disfata kundër Real Sociedad, në “Anoeta”, nuk ishin aksident.
Luis Enrique nuk ka plan B
Atletico Madrid do të kalonte në avantazh, pasi kjo ishte një mundësi. Dhe të gjithë e dinin, sikurse ka ndodhur në të shkuarën, mbrojtja “colchonera” do ta mbyllte veten shumë. Pyetja është: Pse Luis Enrique nuk kishte, nuk propozoi asnjë zgjidhje? Loja e Barçës nuk mundi edhe kësaj here të ishte e parashikueshme. Kundërveprimi i Atletico Madrid ishte tejet efikas, ndërsa ekipi i Luis Enrique nuk ishte në gjendje për të krijuar rrezik. Pa dyshim, Simeone e fitoi betejën taktike me trajnerin e Barcelonës.
Një “xhiro” nga stoli
Bravo, Bartra, Adriano, Douglas, Sergi Roberto, Arda Turan dhe Munir. Ky ishte stoli i Barcelonës në “Vicente Calderon”. Kur loja nuk po shkon si duhet, gjëja e parë që mendon një trajner është hedhja e syve nga stoli i rezervave. Aktivizimi i dy prej tyre, në pjesën e dytë, dëshmoi se Barcelona ka potenciale për t’u “ringjallur”. Stoli i rezervave do të thotë pikërisht këtë: të ketë lojtarë, të cilët janë në gjendje të sjellin diçka të re në ekip. Dhe, pa marrë parasysh se kush jeni, klubi e ka humbur atë që i duhej, që kur u largua Pedro.
Një qendër shkrirë të fushës
Numri i madh i ndeshjeve që akumulon klubi ka konsumuar mesfushën. Busquets nuk është në momentin më të mirë, Rakitic edhe më shumë. Vetëm Iniesta nuk mund të jetë në gjendje të mbajë peshën kryesore të repartit, që i jep frymëmarrje lojës së Barcelonës. Nëse ju mungojnë idetë në sulm, qendra e mesfushës duhet që të paktën të japë qëndrueshmëri, për të shmangur vuajtjen në çdo tranzicion. Rakitic shkoi pa u vënë re në “Calderon”, por problemi është se Arda Turan nuk është duke luajtur ashtu siç pritej. Në këtë pikë vlen të përmendet lëndimi i Rafinha, edhe pse Luis Enrique nuk e ka pasur të preferuar si zgjidhje në mesfushë.
