TIRANE- Ben Blushi duke folur në parlament ka akuzuar palët se po bllokojnë me konsensus reformën në drejtësi. Blushi ka theksuar se edhe nëse do të ketë reformë në drejtësi nuk do të ketë drejtësi dhe për këtë ka dhënë shembullin e moszbatimit të ligjit për dekriminalizimin.
Sipas Blushit të thuash se në Kuvend nuk ka njerëz me precedentë penale është njësoj si t’i bindësh ata se ka pyll pa derra, liqen pa mjelma apo det pa peshkaqenë.
“Shqiptarët nuk do jenë të barabartë para ligjit edhe nëse drejtësia ndryshon me ligj. Cfarë garancie ka që gjykatësit e korruptuar do ndëshkojnë politikanët e korruptuar? Asnjë garanci. Perceptimi është që reforma në drejtësi do përfundojë si një marrëveshje për të mos na ndëshkuar ne. Sot njerëzit po ikin, të varfrit po shtohen, qytetet e vogla po kthehen në fshatra, aty nuk jetohet, por vetëm shitet dhe blihet. Shqipëria e gjitha po kthehet në një pazar që ka pak investime dhe konsum, shumë pak njerëz dhe shumë krim”, tha Blushi.
“Para 3 muajsh qeveria solli një ligj për kompensimin e pronave. Ligji siç erdhi nuk e kthente pronën, por i shkonte vetëm një rruge, rrugës së kompensimit financiar. Që do të thotë se shumica e pronave të pakthyera, nuk i kthehen pronarit, por i paguhen për 10 vjet para, ndërkohë që shteti mban pronën e tij. Qeveria në atë kohë tha se po e sjell ligjin me urgjencë për shkak se jam në negociata me Strasburgun, në mënyrë që kjo gjykatë të mos japë më vendime që të penalizojnë Shqipërinë duke favorizuar ish pronarët. Dikush këtu e besoi dhe e votoi ligjin. Kjo nuk ndodhi. Unë isha një nga ata që nuk e besoja se do ndodhte. Nëse Strasburgu do bënte marrëveshje me një palë, kjo s’është më gjykatë. Para 3 javësh gjykata e Strasburgut dha një vendim 12 milion euro në dëm të shtetit shqiptar për shkak se prona nuk ishte kthyer për 25 vjet. Kjo është faturë që del nga buxheti”, tha Blushi.
