Deputeti i Partisë Socialiste Ben Blushi, njëkohësisht një nga kundërshtarët e kryeministrit Rama lidhur me referendumin që po mbahet sot nga Partia Socialiste, nëse duhen mbajtur ajo jo zgjedhje për kryetarin, ka dhënë arsyet e tij përse nuk votoi në referendum dhe pse ky referendum po manipulohet.
Ja deklarata e tij e plotë…
Sot nuk votova për referendumin që u sajua për të më hequr të drejtën e kandidimit personalisht mua dhe te drejtën e zgjedhjes gjithë antarësisë të Partisë Socialiste. Ky referendum u krye në shkelje të plotë të Statutit dhe rregullave të Partisë.
Lista e zgjedhësve u manipulua duke u reduktuar me afro 20 për qind për të bërë të mundur pjesëmarrjen e cila duhet të jetë 50 plus 1 në mënyrë që referendumi të quhet i vlefshëm tre javë më parë lista e antarësisë ishte rreth 94 mijë ndërsa sot ajo ishte 81 mijë.
Arbitrarisht në këtë referendum nuk u lejua të kishte palë kundër megjithëse ky është rregulli numër një universal i çdo referendumi.
Nëse nuk ka palë nuk ka pse të ketë referendum dhe as pyetje të diskutueshme.
Nuk u lejua të ketë fushatë, nuk u lejua të ketë vëzhgues, nuk u lejua të verifikohet lista e zgjedhësve dhe nuk u lejua të ketë numërues.
Pyetja është kush e vëzhgoi këtë proces?
Kush vendosi, kush është dhe kush nuk është në listën e votimit?
Kush do ti numërojë votat?
Kjo dihet. Gjithë proçesi u përgatit dhe u kontrollua nga Rilindja kundër Partisë Socialiste.
Rilindja e organizoi e trukoi e vëzhgoi dhe do e numërojë.
Megjithatë nga shumë socialistë cilët sot kanë vëzhguar proçesin në mbrojtje të dinjitetit të tyre jam informuar gjatë gjithë ditës për shkeljet, abuzimet me listat, komisionet e ndryshuara, pjesëmarrjen fiktive dhe mbushjet e kutive sidomos në fshatra ku pjesëmarrja rezulton të jetë nën 30 për qind mesatarisht.
Nga të dhënat që kam mbledhur deri në orën 14 rezulton se pjesëmarrja perveçse në Tiranë dhe Durrës pothuajse askund nuk ka kaluar 50 për qind të listës.
Në Vlorë 39 për qind. Në Korçë 46 për qind. Ne Elbasan 41 për qind. Në Gjirokastër 38 për qind. Ne Dibër 34 për qind. Në Shkodër rreth 40 për qind. Në Lezhë nën 40 per qind. Në Fier 48 për qind.
Këto të dhëna natyrisht do pergënjeshtrohen por unë dua të falenderoj gjithë socialistët të cilët e refuzuan këtë referendum që i heq atyre të drejtën e votës. Sigurisht që pas kësaj beteja për të rikthyer zgjedhjet dhe lirinë brenda PS do të vazhdojë pa u ndalur.
