Gjykata e Tiranës urdhëroi dje lirimin nga qelia të katër prej shtatë personave të arrestuar tri ditë më parë nga operacioni policor kundër prostitucionit, i koduar “Mustang”. “Fatin” e lirimit nga dhomat e paraburgimit e patën dyshuarat si prostituta, Aureta B. e Domenika D., që, sipas Policisë, prostituonin për shuma 100-300 euro dhe dy klientët e tyre Melsi M. dhe Hajredin S. Për ta, gjykata caktoi masën e sigurisë “detyrim për paraqitje”. Vendimi i lirimit për dy vajzat 24 dhe 27 vjeçare ishte në kundërshtim me pretendimin e prokurorit, i cili kërkoi lënien e tyre në “arrest në burg”.
Ndërsa dy klientët e tyre u liruan me kërkesë të përfaqësuesit të akuzës. Po ashtu, gjykata pranoi kërkesën e prokurorisë për lënien në qeli të tre të arrestuarve te tjerë, Nik Gjonikaj dhe Besnik Manka dhe Bledjan Nurja, të dyshuar si personat që angazhoheshin në sigurimin e klientëve për dy prostitutat dhe dërgimin e tyre në hotelet ku ushtrohej prostitucioni në zonën e ish-Bllokut në Tiranë.
Seancat gjyqësore për caktimin e masës së sigurisë ndaj tyre u zhvilluan me dyer të mbyllura. Burime të gjykatës pohuan se të dyshuarit kanë mbajtur qëndrim mohues në lidhje me akuzat e ngritura ndaj tyre, përveç dy klientëve. Ata kanë pranuar njohjen me vajzat, por, sipas tyre, në asnjë rast nuk i kanë detyruar të ushtronin prostitucion.
“Unë i kam lëvizur nëpër Tiranë si kliente taksie. Nuk kisha dijeni se çfarë bënin me personat që shoqëroheshin”, mësohet të ketë pretenduar taksisti Nurja. Përmes avokatëve, të pandehurit kërkuan masa të buta sigurie. Pretendimet e tyre janë kundërshtuar nga ana e prokurorit në sallën e gjyqit.
Duke iu referuar hetimit 9 mujor, prokurori tha se ekzistojnë përgjime ambientale, vëzhgime dhe fotografime të të dyshuarve, që provojnë përfshirjen e tyre në veprimtarinë e shfrytëzimit të prostitucionit.
HETIMI
Hetimi që u finalizua me shtatë të arrestuar nisi në fund të vitit 2015. Fillesa ka qenë informacioni i siguruar në rrugë operative se personi me pseudonimin “Nini” merrej me shpërndarje narkotikësh dhe shfrytëzim prostitucioni. Mbajtja nën vëzhgim e këtij personi, të identifikuar si Nik Gjonikaj, zbuloi se ai ishte i përfshirë në veprimtari të paligjshme.
Sipas Prokurorisë, nga vëzhgimi ka rezultuar se datë 23.03.2016, rreth orës 19:00, ai ka hipur në një automjet ku ndodhej Bledjan Nurja, Domenika D. dhe Melsi M. Rreth orës 20:05, shtetasi Nik Gjonikaj ka kryer një telefonatë me një shtetas, i cili e priste te “Pazari i Ri”, dhe pasi ka shkuar në këtë vend, nga automjeti ka zbritur shtetasja Domenika, e cila ka hipur në automjetin me targë AA xxx LS, në përdorim të shtetasit Hajredin S. Po sipas Prokurorisë, në vijim Nik Gjonikaj ka shkuar në qendër të Tiranës dhe ka marrë shtetasen Aureta B. dhe me automjet kanë shkuar në hotelin “V…”. Në këtë vend ajo ka kryer marrëdhënie seksuale kundrejt pagesës 100 euro me Melsi M.
Më pas këta shtetas kanë hipur sërish në automjet dhe në këtë moment është kryer ndalimi i tyre nga punonjësit e policisë. Është kryer dhe ndalimi i shtetasit Nik Gjonikaj në rrugë pranë banesës së tij. Njëkohësisht është bërë dhe ndalimi i automjetit me targë AA xxxLS, në Rrugën e Kavajës, në drejtimin e të cilit ishte shtetasi Hajredin S., mjet ku ndodhej dhe Domenika D. /Panorama
