Një çift të rinjsh me origjinë shqiptare u arrestuan nga policia italiane, pasi në banesën e tyre në Reggio Emilia, u gjetën një sasi parash prej 110 mijë eurosh, 5 kg drogë e llojit kokainë të paketuara në disa qeska, si edhe një armë zjarri pistoletë e tipit Glok me 191 plumba.
Ata janë Renato Hoxha 24 – vjeç dhe e dashura e tij, Andja Balla 20 – vjeçe. Pak ditë më parë, gjatë një kontrolli rutinë, njësia rrugore e policisë italiane ndaloi Renato Hoxhën në Verona dhe gjeti në automjetin e tij 84 mijë euro, një shumë të cilën shqiptari nuk mundi ta justifikonte.
Një fakt i tillë ngjalli së tepërmi dyshimet e agjentëve italianë, që nisën hetimet rreth çiftit, duke zbuluar se ata bënin një jetesë të shtrenjtë, edhe pse ty dy ishin papunë.
Pas informacioneve të siguruara, karabinierët italianë kryen kontrollin në banesë e shqiptarëve, ku gjetën sasinë e drogës, paratë dhe armën, kjo e fundit e fshehur mes veshjeve intime të vajzës. Renato Hoxha dhe Andja Balla ranë në prangat e policisë, ndërsa vijojnë hetimet e prokurorisë italiane për të hedhur dritë mbi aktivitetin e dy të rinjve.
Tv Klan
