Një gjykatë në Missouri ka urdhëruar markën e mirënjohur ‘Johnson & Johnson’ t’i paguajë 72 mln dollarë dëmshpërblim familjes së një gruaje që vdiq nga kanceri në vezore, sëmundje që sipas saj ju shfaq nga përdorimi i pudrës për fëmijë, raporton Reuters.
Jacqueline Fox, nga Alabama kishte deklaruar se e kishte përdorur pudrën e fëmijëve dhe shampon ‘Johnson & Johnson’ për higjienën e saj intime për më tepër se 35 vjet, derisa u diagnostikua me kancer në vezore.
Ajo ndërroi jetë tetorin e vitit të shkuar, në moshën 62-vjeçare dhe i biri paditi kompaninë duke e bërë përgjegjëse për vdekjen e të ëmës. Avokatët e familjes Fox pretendojnë se kompania ishte në dijeni të faktit se produkti mund të shkaktonte kancer, por e ka mbajtur të fshehtë këtë fakt për publikun.
Në shtetin e Missouri janë ngritur rreth 1000 padi kundër produktit kozmetik.
“Ishte e qartë që ata fshihnin diçka, tha për mediat kryetarja e jurisë, Krista Smith. – Gjithçka që duhet të bënin ishte të vendosnin një paralajmërim mbi ambalazhin e produktit”.
Por ‘Johnson & Johnson’ nuk pajtohet me pretendimet e paditësit.
“Për ne nuk ka përgjegjësi më të lartë se sa shëndeti dhe siguria e konsumatorëve, ndaj jemi të zhgënjyer me rezultatin e gjyqit, – tha zëdhënës i ‘Johnson & Johnson’, Carol Goodrich. – Na vjen keq për familjen e paditësit, por besojmë vendosmërisht se siguria e pudrës kozmetike është mbështetur për dekada me radhë me provave shkencore”.
