Taksisti Astrit D. ndodhej para shtëpisë së tregtarit Edmond T., i cili i dorëzoi paratë që i detyrohej prej disa muajsh dhe sapo ka bërë disa hapa për të shkuar te makina e tij, kur u sulmua nga katër persona të armatosur.
Autorët, që sipas dëshmitarëve kanë qenë të maskuar dhe të veshur si punonjës policie, e kanë goditur shtetasin Astrit D. me tytat e armëve dhe i kanë grabitur shumën e parave që sapo kishte marrë nga borxhliu.
Duke qenë se grabitja ka ndodhur në mëngjes, kur banorët e zonës zakonisht zgjohen për të shkuar në punë, ngjarja nuk u ka shpëtuar syve të disa dëshmitarëve.
Sipas tyre, brenda në makinë priste shoferi, ndërsa tre të tjerë kishin sulmuar një person, që ata nuk e njihnin.
“Në fillim menduam se mos ishte Policia dhe po bënte ndonjë arrestim këtu dhe u bëmë edhe kuriozë. Por më pas e morëm vesh që nuk ishin policë, por kishte ndodhur një grabitje. Ishin 4 veta të maskuar dhe kishin veshur uniforma policie. Kishin edhe armë në duar. Ne menduam se ishte grabitur Edmondi, por pastaj morëm vesh që ishte dikush tjetër që ishte grabitur”, tregojnë disa dëshmitarë, që banojnë në rrugicën “Ali Baushi”, ku ndodhi grabitja./Panorama
