TIRANE- Kryparlamentarit Ilir Meta i qëlloi të fliste pas Bashës në tryezën për zgjedhjet kur ky i fundit akuzoi për zgjedhje të korruptuara në 2013. Meta i kujtoi Bashës zgjedhjet e mëparshme të organizuara nga PD në pushtet.
Pjesë nga fjala e Metës në tryezën për reformën zgjedhore
“Ajo që mendoj se është e veçantë, është se do të kemi kohë ta përfundojmë këtë reformë përpara zgjedhjeve të vitit 2017 me gjithë vullnetin politik që ka treguar kreu i qeverisë dhe ai i opozitës.
Dëgjuam shqetësime për dy zgjedhjet e fundit dhe u blodhëm që t’u japim një përgjigje të qartë këtyre problemeve. Por ne e dimë që Shqipëria nuk ka patur vetëm këto kohë zgjedhje dhe probleme ka patur gjithnjë.
Edhe unë që po flas nuk jam krenar për zgjedhjet e 2001-shit kur isha Kryeministër. Por duhet ta themi se ka patur progres në shumë drejtime.
Ajo për të cilën biem të gjithë dakord është se korrupsioni zgjedhor vazhdon të jetë një shqetësim serioz.
Por nuk pranoj unë se qytetarët shqiptarë me zor presin zgjedhjet që të shkojnë te Partitë dhe të marrin tollonin.
Unë nuk mendoj se të gjithë votuesit e opozitës janë të ndershëm dhe ata të mazhorancës të korruptuar.
Në këtë drejtim them se kemi shumë probleme për të adresuar. Ne kemi bërë një hap mjaft të mirë për dekriminalizimin. S’më pëlqen ky term, por çfarë t’i bësh, politika e polli.
Një problem që ne kemi është se kur e dimë se do të humbim zgjedhjet përgatisim terrenin, duke thënë se po blihen zgjedhjet, ka dhunë korrupsion etj.
Në zgjedhjet e fundit vendore, LSI është akuzuar nga opozita se ka blerë vota. Kjo akuzë ka ardhur për disa zona që PDja i ka patur bastione.
Këtu kam një gazetë që më datë 23 maj thotë se qelbësirat shisnin votat. Ka nxjerrë një person që ka blerë vota për llogari të LSIsë.
Ne e kemi çuar çështjen për hetim dhe gjykim, por përfaqësuesit e RD nuk paraqiten në Gjykatë dhe organe për të kontribuar.
LSI ka zbardhur një platformë për zbardhjen e financave të Partisë, pasi kjo është e domosdoshme, pasi ka raste ku fushata del jashtë kontrollit në disa zona.
Ne kemi ngatërruar pak biznesin me politikën dhe ata shpenzojnë edhe nga xhepi i tyre. Dhe kjo krijon përshtypjen se po bëhet ndonjë hata e madhe.
Ne do të zbardhim çdo financim dhe buxhetin e partive. Së dyti, çdo aktivitet publik do të zbardhet financiarisht. Ne kemi vendosur që të bëjmë publikë shpenzimet e tyre që para takimit.
Gjithashtu do të bëjmë publike edhe shpenzimet e kandidatëve, ato para që shpenzojnë nga xhepi.
Problemi tjetër është që kemi shumë biznesmenë në politike. Por ai duhet të jetë një zë cilësor në Parlament dhe jo thjesht një perezencë që mbron interesat vetjake. Për këtë ne kemi menduar që të kufizojmë kandidatët biznesmenë në zgjedhje”.
