Pavarësisht se të gjitha palët deklarojnë së Reforma në Drejtësi duhet të jetë konsensuale, Komisioni i Posaçëm Parlamentar, nuk arriti një ditë më parë të gjejë dakordësinë për draftin e hartuar nga ekspertët e nivelit të lartë.
Komisioni vendosi që, përveç dokumentit të hartuar nga ekspertët, Komisionit të Venecias t’i shkojnë për një opinion përfundimtar dhe propozimet e ekspertëve të Ministrisë së Drejtësisë, që drejtohet nga përfaqësuesi i LSI, si dhe amendamentet që propozojnë ekspertët e opozitës. Këta të fundit kanë lajmëruar që vetëm në fillim të javës së ardhshme do të bëjnë publik draftin me propozimet e tyre.
Po ku ndryshojnë propozimet e palëve, të cilat edhe për një Reformë kaq të rëndësishme, kusht vendimtar për çeljen e negociatave të anëtarësimit në BE, nuk arritën të bien në një mendje.
Pika që ka patur kundërshtimin më të madh të opozitës, që duket se gjen mbështetjen dhe te LSI, është formula kushtetuese për zgjedhjen e anëtarëve të organeve gjyqësore si Gjykata Kushtetuese, Gjykata e Lartë, Anëtarët e Këshillit të Lartë të Gjyqësorit.
Socialistët kërkojnë që të gjithë anëtarët e këtyre institucioneve të zgjidhen me 3/5 ose me 84 vota në parlament, ndërkohë që opozita kërkon të zgjidhen me 2/3 e parlamentit, pasi sipas tyre, maxhoranca aktuale i ka 84 vota dhe nuk i nevojitet konsensusi i opozitës, çka sipas tyre, mund të përbëjë rrezik për kapjen nga ana të majtës në pushtet e sistemit të Drejtësisë.
Përsa i përket Prokurorit të Përgjithshëm, si demokratët ashtu dhe LSI, kërkojnë të mos i përfundojë mandati, pasi ndryshimet kushtetuese të hyjnë në fuqi.
Po ashtu, pikat ku opozita dhe LSI, e cila në tryezën politike mbështet propozimet e Ministrisë së Drejtësisë, është rritja e rolit kontrollues të Ministrit të Drejtësisë në organët gjyqësore, edhe pse Komisioni i Venecias, në raportin paraprak rekomandoi që të rishikohet roli i tij, me qëllim shmangien e një konflikti të mundshëm interesi.
Pika tjetër ku LSI dhe opozita nuk gjejnë dakordësi me socialistët është numri i institucioneve të reja që parashikohet të ngrihen, me ndryshimet kushtetuese, që presin vlerësimin e Venecias, pasi ata mendojnë se nuk është i nevojshëm shtimi i numrit të tyre.
Tv Klan
