Autoriteti i Konkurrencës, pasi ka shqyrtuar procedurat e prokurimit publik të dy loteve me objekt “Përmirësimi, rifreskimi i sinjalistikës vertikale / horizontale në akset kombëtare dhe përmirësimi i sigurisë rrugore – vazhdimi”, ka vërejtur se ndërmarrjet të cilat kanë fituar këto procedura prokurimi me vlera ofertuese shumë afër fondit limit, nuk kanë konkurruar në të dyja lotët dhe mund të kenë përdorur skemën e rotacionit në ofertave duke ndarë tregun pra duke përfituar pjesë përafërsisht të barabarta të fondit limit.
Si rrjedhojë, Konkurrenca ka vendosur hapjen e procedurës së hetimit paraprak në tregun e prokurimit publik me objekt “Përmirësimi, rifreskimi i sinjalistikës vertikale/horizontale në akset kombëtare dhe përmirësimi i sigurisë rrugore – vazhdimi” Loti 1 dhe Loti 2, për të parë nëse ka, ose jo, shenja të kufizimit të konkurrencës”.
Nisur nga një artikull në media ku trajtohet një shqetësim mbi mungesën potenciale të konkurrencës në tregun e shërbimit të sinjalistikës rrugore, Autoriteti i Konkurrencës me shkresën nr 378 prot, datë 14.09.2015, kërkoi informacion nga “Autoriteti Rrugor Shqiptar”, lidhur me procedurat e prokurimit të realizuara në datat 07.09.2015 dhe 09.09.2015 me objekt: “Përmirësimi, rifreskimi i sinjalistikës vertikale/horizontale në akset kombëtare dhe përmirësimi i sigurisë rrugore – vazhdimi, Loti 1 dhe Loti 2”.
Nga shqyrtimi i dokumentacionit lidhur me dy lotet e procedurës së mësipërme rezulton se firmat fituese në të dy lotët kanë qenë shumë pranë fondit limit (96 dhe 97 %) si dhe ka një mungesë të pjesëmarrjes së operatorëve aktivë në tregun përkatës në procedurat e prokurimit në të dyja lotët, përfundon njoftimi i Autoritetit të Konkurrencës.
Sipas të dhënave nga Autoriteti Rrugor, Lotet 1 dhe 2 lidhen me përmirësimin e sinjalistës të segmentit Rrogozhinë- Kapshticë dhe segmentit Vorë-Hani i Hotit.
Sipas të dhënave nga Agjencia e Prokurimeve publike (buletini i njoftimeve publike, njoftim i bërë në datën 30.09.2015), tenderin për “Përmirësimi, rifreskimi i sinjalistikës vertikale / horizontale në akset kombëtare dhe përmirësimi i sigurisë rrugore – vazhdimi, loti 2”, e ka fituar “JUBICA shpk”, ndërsa operatori i skualifikuar ishte RSM COMPANY shpk.
Ky aks rrugor fillon ne Vorë dhe vazhdon deri në Hanin e Hotit dhe kishte një fond limit 499 836 637 lekë pa TVSH. “JUBICA shpk” dha një ofertë prej 484 339 653 lekë. Ndërsa kompania e dytë RSM COMPANY shpk ka paraqitur mangësi të mëdha në dokumentacion dhe është skualifikuar.
Ndërsa për lotin 1, përmirësimi i sinjalistikës në segmentin Rrogozhinë-Kapshticë, pjesmarrës në tender ishin I.D.K Konstruksion dhe RSM, Company, ku fitues është shpallur I.DK. /Monitor/
