Komisioni i Posaçëm për Dekriminalizimin e Parlamentit dhe Administratës Publike ka miratuar dje me konsensus nismën me katër nene të ndryshimeve kushtetuese, që do t’i bashkohet projektligjit të posaçëm.
Sipas amendamenteve që pritet të pësojë Kushtetuta, në rastet kur
funksionarët e lartë të organeve kushtetuese nga verifikimi i pastërtisë
së figurës do të rezultojnë të kenë fshehur dënime, apo të shkuar
kriminale, atëherë mandati i tyre do të shpallet i pavlefshëm brenda 5
ditëve.
Në nenin 4 të draftkushtetutës, thuhet se do të ndërpriten edhe
mandatet që janë fituar para hyrjes në fuqi të këtij ndryshimi
kushtetues. “Mandati i organeve kushtetuese, që është fituar përpara hyrjes në fuqi të këtij ligji, mbaron ose është i pavlefshëm menjëherë nëse
konstatohet se funksionari publik përfshihet në rrethin e subjekteve që
janë të përjashtuara sipas ligjit të posaçëm nga e drejta për t’u zgjedhur, emëruar, apo për të mbajtur një funksion publik. Organi përgjegjës është i detyruar të konstatojë mbarimin ose pavlefshmërinë e mandatit brenda 5 ditëve nga përfundimi i rezultateve të verifikimit”, thuhet në nenin 4.
Ndërkohë që në pikën 5 të këtij neni u jepet e drejta ligjvënësve që të
marrin iniciativë të jo më pak se të 1/5s së deputetëve për të çuar
një çështje të caktuar në Gjykatën Kushtetuese, kur organet
kushtetuese nuk veprojnë brenda 10 ditësh për të shpallur të
pavlefshëm një mandat.
“Me kërkesë të 1/5 s së deputetëve të Kuvendit të Shqipërisë, çështja
i përcillet për shqyrtim Gjykatës Kushtetutës, e cila vendos konstatimin e mbarimit apo pavlefshmërisë së mandatit, ose shkarkimin nga detyra të funksionarit publik, kur plotësohen kushtet dhe rrethanat sipas ligjit të posaçëm”, thuhet në projektligj.
