Kjo foto është bërë në Qeparo ku Kryeministri Edi Rama u gjend në fundjavë për të folur edhe investimet që po bëhen në bregdetin jonian. Fotoja është bërë nga stafi i tij dhe siç shihet shëtitorja është e gjitha beton dhe disa palma nëpër të. Fotoja ka hapur polemika, duke u komentuar si “betonizimi që po i bën Kryeministri, Himarës”.
Por çfarë thotë Kryeministria?
“E gjithë Himara është kthyer në një kantier pune, ku me financim prej rreth 233 milionë lekë të qeverisë, nëpërmjet Fondit Shqiptar të Zhvillimit, ka nisur zbatimi i projektit për rikualifikimin e plotë urban dhe peizazhistik të shëtitores buzë detit, sheshit qendror, që do të vazhdojë me unifikimin e fasadave të ndërtesave dhe krijimin e një qendre administrative tipike të një qyteti mesdhetar”, bën të ditur zyra e shtypit.
Në Qeparo kanë nisur punimet për vazhdimin e shëtitores, segmenti i parë i të cilës që përfundoi para nisjes së sezonit turistik të këtij viti. Ajo do të jetë 2 kilometra dhe gjerësi nga 5 deri në 7metra.
Është pikërisht shëtitorja që shohim në këtë foto.
