Mbrëmjen e kësaj të enjteje, më 14 maj, tema e diskutimit në emisionin “Opinion” në TV Klan të drejtuar nga Blendi Fevziu, ishte “Kush janë 10 shqiptarët më të pasur në botë?”.
Gjatë emisionit u trajtua historiku i krijimit të pasurisë së shqiptarëve në diasporë dhe në trojet shqiptare, duke u theksuar se para viteve ’90, një pjesë e shqiptarëve më të pasur vinin kryesisht nga Kosova dhe kishin emigruar drejt Perëndimit, ku fillimisht u angazhuan në sektorë të ndryshëm të ekonomisë, përfshirë edhe tregun e pasurive të paluajtshme.
Pas viteve ’90, me ndryshimin e klimës ekonomike në Shqipëri, u krijuan mundësi të reja biznesi, duke sjellë edhe lindjen e një klase të re sipërmarrësish. Në këtë kontekst, u përmend edhe Samir Mane si një nga emrat shqiptarë të renditur në listën e “Forbes”, me aktivitet të hershëm edhe në Shqipëri.
Gjatë diskutimit u prezantua edhe një listë me 10 shqiptarët më të pasur, e përgatitur nga vetë Fevziu dhe stafi i emisionit. Drejtuesi i emisionit theksoi se vlerësimi nuk bazohet në matje të sakta të pasurisë, por në të dhëna të bilanceve dhe vlerësime krahasuese të aktiviteteve të tyre ekonomike.
Lista përfshin sipërmarrës dhe figura nga Shqipëria, Kosova, Maqedonia e Veriut, diaspora në Zvicër dhe SHBA-të, si dhe emra të njohur në rang ndërkombëtar si Mira Murati dhe Harry Bajraktari. Gjithashtu u përmendën edhe përzgjedhje nga lista e Forbes “under 30/330” për disa figura premtuese shqiptare në biznes dhe teknologji.
10 shqiptarët në këtë listë: Samir Mane, Shefqet Kastrati, Behgjet Pacolli, Shkëlqim Devolli, Nazif Destani, Sal Rusi, Mira Murati, Harry Bajraktari, Avni Orllati, Esat Likaj.
Të ftuar në studio: Zana Guxholli, Fatjona Mejdini, Ujeza Doshlani, Alma Çelaj, Baton Haxhiu, Mentor Nazarko, Arbër Kadia.
Në pjesën e tretë të emisionit “Opinion” u transmetua një përmbledhje e tri intervistave të realizuara nga gazetari Blendi Fevziu me tre prej biznesmenëve shqiptarë më të pasur në botë. Fjala është për Samir Manen, Behgjet Pacollin dhe Harry Bajraktarin, të cilët kanë rrëfyer historitë e tyre se si iu futën botës së biznesit.
