Kryeministri izraelit Benjamin Netanyahu tha të dielën se kishte urdhëruar ushtrinë të zgjerojë më tej operacionet në jug të Libanit, duke përmendur vazhdimin e sulmeve me raketa nga Hezbollah.
Izraeli tha javën e kaluar se po zgjeronte një “zonë tampon” deri te lumi Litani. Nuk ishte menjëherë e qartë nëse Netanyahu po i referohej kësaj zone apo marrjes së territorit shtesë.
“Tani kam urdhëruar zgjerimin e mëtejshëm të zonës ekzistuese të sigurisë për të penguar përfundimisht kërcënimin e një pushtimi dhe për të larguar zjarrin e raketave antitank nga kufiri ynë,” tha Netanyahu në një deklaratë nga Komanda Veriore e Izraelit.
Zyra e tij refuzoi të japë më shumë detaje, dhe çështja ende nuk është diskutuar nga kabineti i sigurisë.
Javën e kaluar, ministri i Mbrojtjes Israel Katz tha se forcat izraelite do të “kontrollojnë urat e mbetura dhe zonën e sigurisë deri te Litani,” një lumë që derdhet në Mesdhe rreth 30 km në veri të kufirit të Izraelit.
Hezbollahu, i mbështetur nga Irani, filloi të qëllojë me raketa drejt Izraelit pasi Shtetet e Bashkuara dhe Izraeli ndërmorën sulme ajrore ndaj Iranit.
Më shumë se 400 luftëtarë të Hezbollahut janë vrarë që nga fillimi i sulmeve në një luftë të re me Izraelin më 2 mars, sipas burimeve të njohura me shifrat e grupit.
Sulmet ajrore dhe operacionet tokësore izraelite kanë vrarë më shumë se 1,100 njerëz në Liban, përfshirë fëmijë, gra dhe personel mjekësor, sipas ministrisë së shëndetësisë së Libanit. Ajo nuk bën dallim mes civilëve dhe luftëtarëve.
Ushtria izraelite ka thënë se katër nga ushtarët e saj janë vrarë në luftimet në jug të Libanit.
Netanyahu tha se vendimi synon të forcojë pozicionin e sigurisë së Izraelit përgjatë kufirit verior.
“Ne kemi eliminuar mijëra terroristë të Hezbollahut dhe, mbi të gjitha, kemi eliminuar kërcënimin e madh prej 150,000 raketash që synonin të shkatërronin qytetet e Izraelit,” tha ai.
“Megjithatë, Hezbollahu ende ka kapacitet të mbetur për të lëshuar raketa ndaj nesh, ne jemi të vendosur të ndryshojmë rrënjësisht situatën në veri.”
Ai tha se Izraeli po zhvillon një fushatë në shumë fronte kundër Iranit dhe grupeve aleate, përfshirë Hezbollahun dhe grupin militant palestinez Hamas në Gaza, dhe shtoi se veprimet e Izraelit po dobësojnë ndikimin rajonal të Iranit.
