Rusia ka urdhëruar largimin e një diplomati britanik nga territori i saj, duke e akuzuar për aktivitete spiunazhi, në zhvillimin më të fundit të tensioneve diplomatike mes Moskës dhe Londrës.
Shërbimi Federal i Sigurisë (FSB) pretendon se diplomati ka paraqitur informacione të rreme gjatë aplikimit për hyrje në vend, si dhe ka tentuar të sigurojë të dhëna sensitive gjatë takimeve joformale me karakter ekonomik. Sipas mediave shtetërore ruse, autoritetet kanë konstatuar edhe “shenja të aktivitetit të inteligjencës”.
Diplomatit i është hequr akreditimi dhe i është dhënë afat dy javë për t’u larguar nga Rusia. Emri i tij është publikuar në mediat shtetërore ruse.
Reagimi i Londrës: “Akuza të pabazuara”
Ministria e Jashtme e Mbretërisë së Bashkuar e ka cilësuar vendimin si “plotësisht të pakuptimtë”, duke akuzuar Rusinë për një fushatë të koordinuar presioni ndaj diplomatëve britanikë.
Në një deklaratë zyrtare, Londra theksoi se Moska po përhap “akuza dashakeqe dhe krejtësisht të pabazuara” ndaj stafit të saj. “Mbretëria e Bashkuar nuk do të tolerojë intimidimin e diplomatëve të saj dhe familjeve të tyre,” thuhet në reagim.
Pas dëbimit, e ngarkuara me punë e Britanisë në Moskë, Danae Dholakia, është thirrur në Ministrinë e Jashtme ruse, nga ku raportohet se është larguar pa koment për mediat.
Tensione në rritje mes dy vendeve
Ky incident është pjesë e një serie masash reciproke mes dy vendeve, të cilat kanë dëbuar diplomatë të njëri-tjetrit në vitet e fundit.
Marrëdhëniet mes Mbretërisë së Bashkuar dhe Rusisë janë përkeqësuar ndjeshëm që prej nisjes së pushtimit të plotë të Ukrainës nga Rusia në vitin 2022.
Vetëm gjatë këtij viti, Rusia ka dëbuar një tjetër diplomat britanik me akuza për spiunazh. Ndërsa në mars 2025, Moska dëboi dy zyrtarë britanikë, duke nxitur reagimin e Londrës, e cila i cilësoi akuzat si të pabazuara dhe mori masa reciproke duke hequr akreditimin për një diplomat rus dhe bashkëshorten e një diplomati.
Zhvillimet e fundit sinjalizojnë për një përkeqësim të mëtejshëm të marrëdhënieve diplomatike mes dy vendeve.
