Kryeministri i Kosovës, Albin Kurti, ka publikuar një reagim në rrjetin social Facebook, duke shprehur mbështetje të plotë për operacionin e udhëhequr nga Shtetet e Bashkuara të Amerikës në Venezuelë, nën drejtimin e presidentit Donald Trump.
Sipas Kurtit, mbajtja përgjegjëse e aktorëve shtetërorë të përfshirë në trafikimin e drogës është thelbësore për suksesin e luftës kundër kësaj dukurie. Kryeministri theksoi se Kosova, si aleate strategjike e SHBA-së dhe NATO-s, ofron mbështetje të plotë në luftën kundër narkotikëve dhe çdo përpjekjeje për të cenuar vlerat demokratike perëndimore.
Në reagim, Kurti ritheksoi nevojën për vëmendje të shtuar ndaj aktorëve rajonalë që sipas tij synojnë provokimin e situatës së sigurisë përmes veprimeve hibride, kriminale, terroriste dhe ushtarake, duke bërë paralelizëm me sfidat e sigurisë në rajonin tonë.
“Republika e Kosovës mbështet operacionin anti-narkotik të Shteteve të Bashkuara të Amerikës, të udhëhequr nga Presidenti Donald Trump, në Venezuelë. Mbajtja përgjegjës e aktorëve shtetërorë të përfshirë në trafikimin e drogave është thelbësore për suksesin në luftën kundër kësaj dukurie.
Kosova, si aleate strategjike e ShBA-së dhe NATO-s, ofron mbështetje të plotë në luftën kundër trafikimit të narkotikëve dhe kundër cenimit të vlerave demokratike perëndimore nga aktorë përfaqësues (proxy) të kundërshtarëve të këtyre vlerave, si në rajonin tonë ashtu edhe më gjerë.
Në këtë kontekst, ritheksojmë nevojën për rritjen e vëmendjes ndaj aktorëve të caktuar rajonalë, të cilët në vazhdimësi synojnë provokimin e situatës së sigurisë përmes veprimeve hibride, kriminale, terroriste dhe ushtarake”, shkruan Kurti në Facebook.
