Gjatë gjysmës së parë të vitit 2025, kredia për shtëpi në Shqipëri ka arritur nivele rekord, me 36.2 miliardë lekë kredi të reja, që përfaqëson një rritje prej 31.6% krahasuar me të njëjtën periudhë të vitit të kaluar.
Duke iu referuar këtyre të dhënave nga Banka e Shqipërisë, revista Monitor shkruan se rritja është nxitur nga oferta e lartë për financim, normat e ulëta të interesit dhe çmimet e larta të pasurive të paluajtshme.
Kështu, vetëm në qershor, u dhanë 7.4 miliardë lekë kredi të reja, 60% më shumë se një vit më parë, kryesisht për shkak të përpjekjeve për të mbyllur proceset përpara hyrjes në fuqi të rregullave të reja të Bankës së Shqipërisë.
Nga 1 korriku 2025, bankat janë të detyruara të zbatojnë kufizime më të rrepta në dhënien e kredive për banesa, përmes vendosjes së tavaneve për raportin kredi/vlerë të pronës dhe raportin e borxhit ndaj të ardhurave të huamarrësit.
Këto masa synojnë të ulin rrezikun nga zhvillime të pafavorshme ekonomike apo rënie të çmimeve të pronave.
Ndërkohë, portofoli aktiv i kredisë për banesa ka arritur në 230.1 miliardë lekë, duke përbërë 27% të totalit të kredisë në ekonomi, çka tregon se financimi bankar mbetet një shtyllë e rëndësishme për tregun imobiliar shqiptar./tvklan
