Ministrja e Turizmit dhe Mjedisit, Mirela Kumbaro ndodhet në Romë në kuadër të Forumit të Parë të Turizmit Itali-Ballkan. Në këtë takim ministrja Kumbaro u prit nga homologia e saj italiane, Daniela Santachè.
Lajmin ministrja e ka dhënë në një postim në rrjetin social Facebook, ku ndër të tjera konfirmon se “në këtë forum do të jenë të pranishëm kolegët nga Kroacia, Greqia, Maqedonia e Veriut, Mali i Zi, Serbia dhe Bullgaria.”
Siç bën me dije ministrja e Turizmit, Kumbaro ky forum mbahet me qëllim ngritjen e platformës së re të bashkëpunimit turistik.
Forumi vjen në një moment kur rajoni i Ballkanit po njeh një rritje të konsiderueshme të interesit turistik dhe përfaqëson një hap konkret drejt krijimit të një modeli të integruar të turizmit mesdhetar, ku Shqipëria ka një rol gjithnjë e më të spikatur.
Postimi i ministres Kumbaro
Ditë të mbarë me mikpritjen e ngrohtë nga Ministrja e Turizmit e Italisë Daniela Santachè, në nisje të “Forumit të Turizmit Itali – vendet e Ballkanit” në Romë, së bashku me kolegët nga Kroacia, Greqia, Maqedonia e Veriut, Mali i Zi, Serbia dhe Bullgaria për të ngritur një platformë të re bashkëpunimi turistik./ opinion.al
