Në mbledhjen një orë në selinë rozë, kryeministri Edi Rama ka ndarë detyrat për kryeqytetin. Puna në bashkinë Tiranë do të ndahet në blloqe, me përfaqësues të këtij institucioni, deputetë dhe ministra.
Hapësirat publike, parkingjet, shërbimet dhe lejet e ndërtimit, mësohet se janë katër pikat për të cilat Rama ka kërkuar mobilizim të veçantë. Siç raporton gazetarja e Klan News, Klesiana Omeri, ministrat do të kenë rol më të shtuar, sepse duhet të ndihmojnë me problematikat. Për shembull, në rast se ka probleme me financat, ndërhyn Ministria e Financave, me ujësjellësin ajo e Infrastrukturës, e me radhë.
Për hapësirat publike do kujdesen posaçërisht kryetarja e komanduar e bashkisë Tiranë Anulea Ristani dhe ministrja e Arsimit dhe Sportit Ogerta Manastirliu. Për problematikat me trafikun, do të angazhohet ministri i Ekonomisë, Kulturës dhe Inovacionit, Blendi Gonxhja dhe Ervin Hoxha, ministri i Brendshëm.
Ministri për Pushtetin Vendor Arbjan Mazniku dhe Anulea Ristani, do kenë fokus të shtuar te burimet e bashkisë, ndërsa me pjesën e financave do merren ministri Petrit Malaj dhe Ministrja e Shtetit për Sipërmarrjen dhe Klimën e Biznesit, Delina Ibrahimaj.
