Turqia perëndimore po lufton me flakët prej disa ditësh. Mbi 950 persona, të mbështetur nga helikopterë, avionë dhe kamionë zjarrfikës, janë duke punuar për izolimin e flakëve, por erërat e forta dhe moti i thatë kanë përhapur edhe më shumë zjarret në pyje.
Qytetet e prekura janë Sakarya, Bilecik, Izmir dhe Manisa. Zjarret që shpërthyen më 27 qershor kanë djegur zona të gjera dhe kanë shkaktuar evakuime të qytetarëve.
Zjarret shpërthyen edhe pranë shtëpive në Hatay të Turqisë, ku banorët u evakuuan. Guvernatori rajonal, Mustafa Masatlı, tha se të paktën 20 shtëpi u boshatisën dhe njerëzit u zhvendosën në konvikte.
Më shumë se 50,000 njerëz janë evakuuar nga pesë rajone, përfshirë më shumë se 42,000 në Izmir, sipas autoritetit turk të menaxhimit të emergjencave, AFAD.
Flakët po zhvendosen shpejt drejt jugut, duke përfshirë toka pyjore dhe duke kaluar kufijtë administrativë në rrethin Gölpazarı të Bilecikut në rajonin Marmara. Gjatë tre ditëve, zjarri ka djegur rreth 35 kilometra katrorë pyll në të dy provincat.
Si masë paraprake, zyrtarët urdhëruan evakuimin e 13 fshatrave. Disa shtëpi të vendosura në zonat rurale të Bilecikut u shkatërruan gjithashtu nga flakët. Nuk janë raportuar viktima, por ndikimi në jetën e egër dhe ekosistemet lokale pritet të jetë i konsiderueshëm.
Sipas meteorologëve, shpejtësia e erës pritet të kalojë 80 km/h, gjë që mund ta vështirësojë punën e zjarrfikësve për të shuar flakët. Autoritetet kanë bërë një apel të fortë publik, duke i nxitur qytetarët që të mos përdorin fishekzjarrë, të cilët mund të shkaktojnë zjarre. Klan News
