Riviera shqiptare vijon të rrëmbejë vëmendjen e mediave ndërkombëtare por dhe rrjeteve prestigjioze të turizmit. E radhës është platforma globale “The World’s 50 Best Beaches” e cila ka në fokus plazhet më të bukura të Europës për vitin 2025, ku në mesin e tyre përfshin Gjirin e Gramës dhe të Gjipesë.
Sipas renditjes së kësaj platforme të turizmit, Gjiri i Gramës renditet në vendin e 12, ndërsa ai i Gjipesë pozicionohet në vendin e 30-të, duke lënë pas plazhe të njohura të Italisë, Spanjës, Greqisë dhe Francës.
Ky vlerësim bazohet në një përzgjedhje të kujdesshme nga rreth 1,000 profesionistë udhëtimesh, ambasadorë plazhesh dhe një juri ndërkombëtare, të cilët marrin në konsideratë elementë si autenticiteti, natyra e paprekur, qetësia dhe përvoja unike që plazhi ofron.
Gjiri i Gramës, një perlë e Detit Jon, tërheq vëmendjen me ujin kristal dhe masivet shkëmbore që e rrethojnë, duke krijuar një ambient unik dhe të pastër.
Gjiri i Gjipesë, i vendosur në hyrje të një kanioni spektakolar, njihet për pamjet mahnitëse dhe atmosferën e qetë që ofron, duke u bërë një nga simbolet e ekoturizmit në Shqipëri.
Përfshirja në këtë listë nga platforma globale “The World’s 50 Best Beaches” është një tjetër dëshmi e potencialit turistik të Shqipërisë, e cila po preferohet gjithnjë e më shumë si një destinacion elitar në Mesdhe.
Vetëm në 5 muajt e parë të këtij viti Shqiperinë e kanë vizituar mbi 3.4 milionë turistë të huaj ose 3,9% më shumë krahasuar me të njëjtën periudhë të vitit 2024 sipas INSTAT. Klan News
