Deputetja e Partisë Demokratike, Albana Vokshi ndodhet në Strasburg, ku mori pjesë në Asamblenë Parlamentare të Këshillit të Evropës, për të paraqitur parregullsitë që sipas tyre kanë ndodhur në zgjedhjet e 11 Majit.
Gjatë fjalës së saj, Vokshi ka kërkuar një hetim ndërkombëtar për zgjedhjet si dhe mbrojtje më të madhe për gratë në politikë.
Po ashtu, Vokshi ndau një përjetim personal gjatë procesit zgjedhor në Vorë, duke u shprehur se ajo dhe vajza e saj u kërcënuan nga bandat kriminale.
Fjala e plotë:
Të nderuar kolegë,
Faleminderit për misionin vëzhgues të Këshillit të Evropës gjatë zgjedhjeve të 11 majit në Shqipëri, që ofroi një pamje të vlefshme të realitetit në terren. Raporti paraqet shqetësime serioze. Por e vërteta është shumë më alarmante.
Kur vota nuk është e lirë, demokracia nuk ekziston!
Nuk mund të ketë standarde të dyfishta për vendet anëtare të BE-së dhe për vendet kandidate si Shqipëria.
Prandaj unë shtroj para jush disa pyetje:
A mund të quhen demokratike zgjedhjet,
– kur shumica e kritereve të Kopenhagës janë shkelur në mënyrë sistematike dhe brutale?
– Kur shteti dhe partia në pushtet janë një?
– Kur nëpunësit civilë, votuesit dhe kandidatët kërcënohen – përmes rrjeteve të patronazhit si dhe nga kriminelë me distinktivë fallco vëzhguesish brenda dhe jashtë qendrave të votimit – ndërsa policia mbyll sytë ose ndërhyn shumë vonë?
– Kur mediat janë nën kontroll?
Pak javë para zgjedhjeve, Kryeministri miratoi 138 licenca për kultivim kanabisi – 147 herë më shumë se kufiri ligjor – duke mbuluar 29,000 hektarë, kryesisht në zonat kufitare. Partia në pushtet pati rritje të ndjeshme votash në ato rajone. Kjo nuk është një garë demokratike – është një kërcënim për sigurinë kombëtare.
402 milionë euro fonde publike u keqpërdorën për të blerë vota dhe manipuluar rezultatin:
- 100 euro bonus për mbi 750,000 pensionistë (ose 42% e votuesve)
- 200 milionë euro gjoba të falura dy ditë para zgjedhjeve
- vende pune, subvencione, tendera dhe evente luksoze të kthyer në mjete për më shumë vota.
Vota u ble edhe me paratë e taksapaguesve.
Kam marrë pjesë në shumë zgjedhje. Por kurrë s’kam përjetuar atë që pashë këtë herë.
Në Vorë, u kërcënova në mes të ditës nga kriminelë të dënuar për vrasje dhe trafik droge. Vajza ime gjithashtu u kërcënua. Pavarësisht telefonatave Policisë së Shtetit si dhe kallëzimeve zyrtare në SPAK, askush nuk veproi. Ata kriminelë janë ende të lirë, ndërsa unë druhem çdo ditë derisa fëmijët kthehen në shtëpi.
Prandaj ju pyes sërish:
A janë këto zgjedhje të lira, kur kandidatet gra përballen me kartele dhe jo me parti politike?
Unë nuk hyra në politikë për të mbajtur armë – por për të ofruar një alternativë të bazuar te e vërteta.
E kjo e drejtë më është mohuar – për shkak të lidhjeve midis zyrtarëve të lartë (Kryeministri, ministra) dhe krimit të organizuar.
A duhet të rri e heshtur, e qetë por e frikësuar? Jo. Nuk do të hesht.
Ne duhet të flasim – për vajzat tona, për familjet tona, dhe për çdo grua që dëshiron të shërbejë pa frikë.
Nëse nuk veprojmë, ia dorëzojmë politikën atyre që mbrohen nga krimi – jo nga demokracia. 28 kandidatë në 10 qarqe u mbështetën nga grupet kriminale dhe kartelet e drogës. Mbi 20 prej tyre do të jenë në parlamentin e ardhshëm. Dhe me siguri do të jenë edhe këtu në këtë sallë.e unë këtë nuk do ta doja.
Prandaj ju bëj thirrje:
Për mbështetjen e një misioni fakt mbledhës në Shqipëri. Takoni të gjithë aktorët. Vlerësoni ndikimin kriminal dhe dështime në standartet e demokracisë.
Kam dorëzuar një video të shkurtër për këtë seancë plenare – me shpresën që të shihni me sytë tuaj si kanë qenë realisht këto zgjedhje, e kushdo që do të dojë mund tja dërgoj.
I bëj thirrje çdo deputeteje këtu në këtë salle: kjo nuk toleruar! Duhet të jemi krah njëra-tjetrës. Të qëndrojmë bashkë për të krijuar një mjedis ku gratë mund të bëjnë politikë dhe t’i shërbejnë vendit të tyre me dinjitet.
Faleminderit.
