Drejtori i përgjithshëm i DW-së, Peter Limbourg, pas dy mandatesh në këtë post nuk rikandidoi më. Këshilli drejtoues zgjodhi (20.06.2025) direkt në raundin e parë pasuesen e tij në këtë detyrë: Barbara Massing. Ajo e njeh shumë mirë DW. Aktualisht Massing është drejtore e administratës së medias publike të Gjermanisë për botën e jashtme me seli në Berlin dhe në Bon. Massing më 1 tetor 2025 nis detyrën e drejtimit të DW-së.
“Jam shumë i gëzuar, që me Barbara Massing mundëm të zgjedhim një drejtuese, e cila jo vetëm ka kompetencë të shkëlqyer në drejtim dhe përvojë gazetareske, por ajo ka edhe vizion strategjik për ta prezantuar Deutsche Welle-n të sigurt për të ardhmen në një pejzazh global mediak plot sfida”, vlerësoi vendimin Karl Jüsten, kryetar i Këshillit Drejtues.
Massing gëzon reputacion të lartë në grupimin e rrjetit të medias publike kombëtare në Gjermani ARD dhe ajo ka një rrjet të gjerë kontaktesh, tha Jüsten, i cili në profesionin e tij është drejtues i Komisariatit të Ipeshkëve katolikë gjermanë në Berlin. Gjatë mandatit si drejtore e administratës së DW-së, Massing ka kontribuuar ndjeshëm në zgjerimin e ofertës programore të DW-së dhe konceptimin efikas dhe modern të saj.
Massing: Informacionet e besueshme të bazuara në fakte janë “kapitali ynë më i çmuar”
Massing pas zgjedhjes falenderoi Këshillin Drejtues “për besimin dhe shansin, që bashkë me të gjithë personelin si drejtore e përgjithshme të konceptojë të ardhmen e DW-së”. Ajo bëri të qartë, se informacionet e besueshme të bazuara në fakte janë “kapitali ynë më i çmuar”. “Kjo vlen më shumë se kurrë në kohët e përmbajtjeve të manipuluara nga Inteligjenca Artificiale dhe desinformimi”, u shpreh 54 vjeçarja Massing. Fokusimi në rajone, digjitalizimi dhe një kulturë dinamike dhe gjithëpërfshirëse e sipërmarrjes “do të jenë linjat kryesore drejtuese në rrugën tonë të përbashkët”, tha Massing lidhur me planet e saj.
Achim Dercks, nënkryetar i Këshillit Drejtues të DW-së, duke shprehur gëzimin për bashkëpunimin në të ardhmen me drrejtoren e re të përgjithshme, theksoi: “Barbara Massing si drejtore e administratës ka kontribuuar ndjeshëm në stabilizimin financiar dhe zgjerimin e ristrukturimin e suksesshëm të DW-së gjatë viteve të fundit.”
Bashkë me Massing, shtoi ai, Këshilli Drejtues do të vazhdojë të angazhohet, që DW e financuar nga taksat të forcohet si duhet në “këto kohë me sfida gjeopolitike”. Sepse Deutsche Welle duhet të “mbetet një zë i rëndësishëm në botë dhe të furnizojë njerëzit me informacion të lirë”, tha Dercks.
Ministri i shtetit për Kulturën Weimer: “DW zë i fuqishëm i lirisë”
Ministri i shtetit për Kulturën dhe Mediat, Wolfram Weimer, vlerësoi Massing si „menaxhere me përvojë”, e cila e di si mund të modernizohet DW.
Barbara Massing pason Peter Limbourg, i cili pas 12 vjetësh vendosi të mos rikandidojë për një mandat të tretë. Massing është e para grua në krye të DW-së.
Barbara Massing është që nga viti 2014 drejtore e administratës dhe njëkohësisht anëtare e ekipit drejtues të DW-së. Ajo nisi punën në DW më 2006 si refernete në sektorin e distribuuimit dhe më pas për gjashtë vjet në pozicion drejtues konceptoi strategjinë e DW-së. Më parë ajo ka qenë producente në redaksinë e ARD-së për dokumentarë si dhe refrente në median gjermano-franceze ARTE.
Si drejtore e përgjithshme Massing në gjashtë vitet e ardhshme do të drejtojë DW-në, media publike e Gjermanisë për botën e jashtme me një ofertë programore në 32 gjuhë në platformat: televizion, radio dhe online. Në mbarë botën për DW punojnë rreth 4000 punonjës nga më shumë se 140 vende. Çdo javë audienca e programeve televizive, online dhe radifionike të DW-së arrin në 320 milionë vetë. /DW
