Vijojnë kontrollet intensive me dronë, radarë, kamera, si dhe me prani të shtuar të shërbimeve të policisë për të evidentuar e ndëshkuar shkeljet që cenojnë sigurinë dhe që pengojnë lëvizjen në rrugë.
Konkretisht Policia Rrugore njofton se gjatë javës së fundit, 30 drejtues automjeti janë arrestuar ose proceduar për veprat penale në fushën e qarkullimit rrugor.
“20 automjete janë tërhequr me mjet ngritës, pasi ishin parkuar në korsitë e autobusëve, taksive ose biçikletave. Ndërsa 22 leje drejtimi u pezulluan për shkelje të rënda të Kodit Rrugor. Policia Rrugore vijon kontrollet pa ndërprerje, në të gjitha akset dhe zonat urbane, me zero tolerancë ndaj çdo shkeljeje që cenon sigurinë rrugore dhe rrezikon jetën e përdoruesve të rrugës”, thuhet në njoftimin e policisë.
Gjithashtu janë apeluar sërish të gjithë drejtuesit e mjeteve, që të respektojnë me rigorozitet rregullat e qarkullimit rrugor, si një domosdoshmëri për garantimin e sigurisë në rrugë dhe për mbrojtjen e jetës.
