Janë shpallur 55 projektet fituese të thirrjes së parë për bashkëprojekte ndërmjet studiuesve shqiptarë dhe diasporës akademike, mbështetur nga programi READ.
Lajmin e ka bërë të ditur vetë Ministrja e Arsimit dhe Sportit, Ogerta Manastirliu, e cila thotë se kjo është një nismë e përbashkët e Agjencisë Kombëtare të Kërkimit Shkencor dhe Inovacionit (AKKSHI) dhe Fondacionit Shqiptaro-Amerikan për Zhvillim (AADF).
Në fjalën e saj gjatë ceremonisë së prezantimit të projekteve fituese, Ministrja e Arsimit dhe Sportit, Ogerta Manastirliu theksoi rëndësinë e këtij bashkëpunimi për zhvillimin e kërkimit shkencor dhe ndërkombëtarizimin e arsimit të lartë.
“Kemi hedhur një tjetër hap të rëndësishëm për kërkimin shkencor dhe arsimin e lartë në vendin tonë, me shpalljen e 55 projekteve fituese të thirrjes së parë të programit #READ, ku bashkë me Fondacionin Shqiptaro-Amerikan për Zhvillim, kemi bërë bashkë energjinë e studiuesve vendas dhe eksperiencën e diasporës sonë akademike.
Projekte në teknologji, mjekësi, mjedis, turizëm e fusha të tjera strategjike që do të realizohen nga 200 studiues vendas dhe 55 akademikë nga diaspora, nga universitete si ETH Zurich, Rutgers, Bologna, etj., do të nxisin shkëmbimin e dijes, ndërkombëtarizimin dhe përmirësimin e infrastrukturës kërkimore në vendin tonë”, shkruan Manastirliu.
