Pedagogia dhe tashmë edhe deputetja e Partisë Socialiste në Parlamentin e ri, Iris Luarasi ka folur lidhur me situatën politike në vend në studion e Klan News me gazetarin Drini Zeqo.
Luarasi ka treguar se si vendosi të bëhej pjesë e listave të Partisë Socialiste, teksa ka zbuluar edhe faktin që kjo nuk ka qenë oferta e parë për t’u përfshirë në politikë.
“Oferta vjen nga Kryeministri dhe pastaj u elaborua më shumë nga drejtuesja e qarkut të Tiranës, zonja Manastirliu. Nuk është se e prisja, por as nuk u befasova. Ishte nga ato oferta që duket se kanë një cikël dhe vjen në mënyrë të natyrshme. Oferta kam pasur edhe më përpara, në 2013 më seriozia. Kjo nuk ishte oferta e parë. Atëherë më dukej se nuk isha gati t’i futem politikës edhe e kisha shumë qasje të mirë dhe më dukej”, shprehet pedagogia Luarasi.
Gjatë intervistës kur u pyet për situatën politike në vend, Luarasi theksoi se kjo e fundit në Shqipëri është shumë agresive dhe bipolare. Deputetja e re theksoi edhe rëndësinë e opozitës në një qeverisje të mirë të vendit.
“Gjithmonë e kam thënë dhe vazhdoj ta them. Mendoj që politika në Shqipëri është shumë agresive edhe për fat të keq mendoj se ky agresivitet nga parlamenti, agresivitet bipolar përkthehet edhe tek pjesa tjetër e shoqërisë dhe gjithmonë e kam akuzuar parlamentin për të qënurit kaq bipolar dhe mendoj që patjetër njerëzit kanë kauzat e tyre dhe mekanizmat për ta kaluar procesin në një proces debati konstruktiv, institucional, ku fiton mendimi më i mirë, por në fund të ditës prandaj realizohen edhe zgjedhjet. Gjithë kjo pjesa e luftrave, braktisjeve unë kam qenë kundër. Kam thënë që opozita është një aset i demokracisë, një mënyrë se si ti e mban qeverinë përgjegjëse. Qeveria tenton të bëhet arrogante kur opozita është e shkalafitur. E vetmja mënyrë për ta mbajtur qeverinë përgjegjëse është kur opozitën e ke super të fortë”, u shpreh Luarasi.
Sa i përket opozitës në vendin tonë, Luarasi theksoi se humbja e thellë e tyre duhet të jetë një mësim për të ardhmen.
“Unë mendoj që opozita në këto momente nëse nuk e ka mësuar mësimin dhe rezultati i këtyre zgjedhjeve me rreth 145 mijë vota më pak, kjo tregon që ti ke një problem shumë të madh me votuesin. Ke marrë notën tënde tek votuesi dhe duhet ta lexosh këtë për ta kthyer në një histori suksesi në të ardhmen. Zgjedhësit me notën që të kanë vënë kanë treguar që kjo nuk është performanca që ata presin nga ty”, thotë Luarasi.
Ndërkohë lidhur me pjesëmarrjen e grave në Parlament, Luarasi u shpreh se është një përfaqësim shumë i mirë ku theksoi edhe faktin se në vendin tonë ende nuk ka rëndësi cilësia që përfaqëson një grua, por vetëm fakti nëse ti je burrë apo grua.
“Çdo Parlament kur ne flasim për gratë bëjmë një lloj gjykimi që disa prej tyre janë të zonja dhe disa të pazonja. Nuk bëhet pyetje që të analizojmë burrat në Parlament. Gratë janë 52% e popullsisë. Kuota e grave njihet si kuota diskriminuese pozitive. Për këtë arsye kjo kuota është vërtetë diskriminuese se rasti e tregoi që ke njërëz si zoti Qefalia që nga pikamja e votave kanë marrë shumë më tepër vota, por për shkak të këtij diskriminimit pozitiv një në 3 veta duhet të jetë grua. Mendoj që është përfaqësim shumë i mirë sepse ende në Shqipëri nuk ka më rëndësi cilësia që përfaqëson një grua, është vetëm fakti nëse ti je burrë apo grua”, thekson Luarasi.
