Ervin Salianji, ish- deputeti i Partisë Demokratike, ka dorëzuar një kërkesë për lirim të parakohshëm nga qelia.
Mësohet se kërkesën, Ervin Salianji e ka bërë te Gjykata e Fierit. Ndërkohë më 26 shtator, Gjykata e Apelit vendosi lënien në fuqi të dënimit me 1 vit burg për veprën penale të kallëzimit të rremë për deputetin e Partisë Demokratike, Ervin Salianji, ndërsa ky i fundit e quajti procesin të montuar dhe veten si të dënuar politik.
“Jam i dënuari i parë politik në këto 34 vite pluralizëm. Ky është dënim politik, njësoj si agjitacioni dhe propaganda dikur,” tha Salianji. “Unë nuk kam bërë një betejë për të vjedhur dhe për të vrarë, por kam bërë një betejë kundër trafikantëve të drogës,” deklaroi ai, duke shtuar se është i disponueshëm që ta kryejë dënimin në çdo lloj burgu.
Që prej 26 shtatorit, Ervin Salianji ndodhet në burgun e Fierit duke kryer dënimin.
