Ministri i Jashtëm i Rusisë, Sergei Lavrov, i është përgjigjur kancelarit të Gjermanisë, i cili tha se aleatët perëndimorë kanë hequr kufizimet e rrezes së veprimit për armët e furnizuara Ukrainës.
Sipas mediave të huaja, Lavrov kritikoi udhëheqësit evropianë dhe tha se ky veprim ilustron nivelin e kompetencës së atyre që janë ngritur në pushtet në Evropë.
Ai gjithashtu tha që vendimi ishte marrë shumë kohë më parë, por ishte mbajtur sekret. Kujtojmë se SHBA-të nën drejtimin e Presidentit Joe Biden lejuan Ukrainën të niste sulme ajrore në territorin rus vitin e kaluar, të cilat u ndoqën nga Mbretëria e Bashkuar dhe Franca. Vendimi ishte publik në atë kohë.
Merz i ka tërhequr disi komentet e tij të djeshme, duke thënë sot se po fliste për një vendim të marrë muaj më parë.
Lavrov vazhdoi me kritikat e tij ndaj Evropës, duke e akuzuar atë se po përpiqet të prishë procesin e negociatave për t’i dhënë fund luftës.
“Nëse lufta ndalet, karrierat e tyre politike do të mbarojnë, ata po i vënë interesat e tyre personale mbi njerëzit e tyre”, tha ai.
Por duke iu drejtuar Donald Trump, Lavrov përdori një ton të ndryshëm.
“Trump dëshiron rezultate dhe kur sheh se përpjekjet e tij po sabotohen nga evropianët, sigurisht që retorika e tij ndryshon”, shtoi ai.
“Por nuk duhet të shohim retorikën që i duhet Evropës, për të ndaluar sabotimin e rrugës drejt paqes”, vijoi Lavrov.
Siç kemi raportuar, Rusia ka shtuar sulmet e saj ajrore ndaj Ukrainës. Sulmi më i madh ajror i luftës u ndërmor ditët e fundit.
Kjo e shtyu Trumpin ta përshkruante përshkallëzimin e sulmeve nga Putini si “të çmendur”.
Komentet e Lavrovit synojnë qartësisht ta mbajnë presidentin amerikan në gatishmëri.
