“Në qershor do luani kundër Shqipërisë, për t’i mposhtur ata!” Kështu është shprehur Aleksandar Vuçiç kur kanë mbetur më pak se tre javë nga përballja sportive Shqipëri-Serbi, e cila do të luhet në Tiranë.
Vetëm pak orë pas vizitës në Tiranë për Samitin e 6-të të Komunitetit Politik Europian, presidenti serb ndezi sfidën.
Siç raportojnë mediat gjatë mitingut të partisë së tij në Nish, ai i dha një mesazh të qartë trajnerit të përfaqësueses, Dragan Stojkoviç, i cili shfaqet hapur si mbështetës politik i Vuçiç.
“E pashë pak më parë dhe e shoh që është këtu, ju lutem duartrokitni fort trajnerin serb Dragan Stojkoviç. Një legjendë e Nishit, ‘Piksi’ nuk u fsheh si shumë të tjerë dhe erdhi të jetë me ne sonte. Në qershor luani atje kundër Shqipërisë, për t’i mposhtur ata!”, tha Vuçiç.
Shqipëria dhe Serbia do të luajnë më 7 qershor në Arenën Kombëtare, prej orës 20:45. Ndeshja e tretë e Grupit K kualifikues të Botërorit 2026 do të zhvillohet pa praninë e mbështetësve serbë në Tiranë.
