Për herë të 16-të të enjten, deputetët nuk kanë arritur të konstituojnë Kuvendin e Kosovës. Ngërçi sërish mbeti te votimi për formimin e një komisioni për votim të fshehtë për zgjedhjen e kryeparlamentarit. 55 vota ishin pro, një kundër dhe nuk pati abstenime. Seanca e radhës do të jetë 17 maj në orën 10:30.
Kryetari i PDK-së, Memli Krasniqi, ka përsëritur thirrjen që Lëvizja Vetëvendosje të ndërrojë kandidaten për kryeparlamentare në mënyrë që të zgjidhet ngërçi politik.
Krasniqi ka thënë se është e pakuptueshme se si një kandidat mund të jetë më i rëndësishëm se gati 1 milion qytetarë që kanë votuar.
“Ky është serial i turpshëm i pengmarrjes institucionale që po e realizon VV-ja, me bllokimin jo vetëm të konstituimit, por edhe të krijimit të institucioneve sipas verdiktit të qytetarëve. Fiks një muaj më parë, jemi mbledhur këtu dhe jemi një muaj më vonë dhe shumë muaj pas zgjedhjeve, dhe jemi në bllokadën që po e mban partia në pushtet. Kjo është e tepërt. Edhe një herë i bëj thirrje VV-së dhe deputetit Kurti ta ndërrojë kandidaten që merr herë 55, herë 56, herë 53 vota sepse nuk do t’i marrë 61. Është e pakuptueshme se si një kandidat mund të jetë më i rëndësishëm se gati 1 milion qytetarë që kanë votuar”, ka thënë ai pas dështimit të 16-të.
