Kryeministri Edi Rama i është përgjigjur liderëve botërore, të cilët e kanë uruar për fitoren në zgjedhjet parlamentare të 11 Majit.
Në përgjigjen e tij ndaj Presidentes së Komisionit Europian, Ursula von der Leyen, Rama theksoi se Shqipëria ka nevojë për mbështetjen e saj në rrugëtimin drejt Bashkimit Evropian.
“Faleminderit me gjithë zemër, e dashur Ursula. Fjalët e tua kanë shumë rëndësi dhe mbështetja jote ka edhe më shumë — sidomos në këtë moment përcaktues në rrugën e Shqipërisë drejt Bashkimit Europian.
Për më tepër, nuk mund të kishte moment më të përshtatshëm për të të mirëpritur në Tiranë — menjëherë pasi populli shqiptar foli me një zë të fuqishëm për ëndrrën e madhe dhe vendosmërinë e palëkundur për t’u bërë anëtarë të plotë të familjes europiane brenda kësaj dekade. E di që Shqipëria mund të mbështetet tek ti dhe tek udhëheqja jote.
Dhe ti duhet ta dish që ne jemi plotësisht të vetëdijshëm: në këtë rrugë, nuk ka dhurata për të kërkuar, vetëm merita për të fituar. Prandaj po, të synojmë më të mirën që ende na pret! Gjithmonë së bashku”, ka shkruar Rama.
Ndërkohë për mesazhin e presidentit francez Emmanuel Macron, Rama thotë se ky urim ka një domethënie të madhe për të dhe Shqipërinë.
“Faleminderit nga zemra, i dashur @EmmanuelMacron, për mesazhin tuaj urues që ka një domethënie të madhe — jo vetëm për mua, por edhe për marrëdhëniet mes Shqipërisë dhe Francës. Falë jush dhe qasjes suaj ndaj Ballkanit Perëndimor, këto marrëdhënie kanë arritur një nivel të paparë më parë.
Është vërtet e mrekullueshme që Shqipëria ka nderin t’ju presë sërish si një mik i çmuar, me rastin e Samitit të Komunitetit Politik Evropian, dhe që do të qëndroni më tej me ne për të bërë një vlerësim të bashkëpunimit tonë intensiv.
Mirë se vini, mik i dashur!”, tha Rama.
E ndërsa për homologun Viktor Orban, Rama shprehet se mezi pret të vijojë bashkëpunimin me Hungarinë për integrimin e Shqipërisë drejt BE-së.
“Faleminderit me gjithë zemër, i dashur Viktor. Mezi pres të vazhdojmë punën tonë së bashku në të mirën më të madhe të vendeve tona të bukura, si dhe për integrimin e plotë të Shqipërisë dhe Ballkanit Perëndimor në Bashkimin Evropian — një kauzë të cilën ti e ke mbështetur prej kohësh.
Dhe po, mezi pres gjithashtu të të mirëpres në Tiranë për Samitin e Komunitetit Politik Evropian, pas atij takimi fantastik që patëm të gjithë në Budapest vetëm gjashtë muaj më parë — ku ti e vendose nivelin shumë lart, miku im”, shkruan Rama.
