E ndërsa në qarkun e Fierit po vijon numërimi i votave preferenciale pas korrjes së fitores së Partisë Socialiste, janë disa emra që deri tani po “spikasin” për nga votat e marra nga qytetarët.
Gazetarja Anila Sefa, shprehet se deri tani 7 emrat më të votuara janë Klevis Jahaj, Elton Korreshi, Ceno Klosi, Antoneta Dhima, Zegjine Çaushi dhe Ilirja Musko.
Le të ndalemi pak tek Zegjine Çaushi. Një vajzë e re, kandidate në listën e hapur të Partisë Socialiste, e cila duket se fitoi pëlqyeshmëri me sulmet ndaj demokratit Gazmend Bardhi në rrjete sociale. Këta të dy patën një “luftë online” mes thumbash dhe shpesh herë deklarata paksa qesharake, por kjo mesa duket ka funksionuar në favor të socialistes.
Pritet që ajo të fitojë një karrige në Kuvendin e ri, për shkak të numrit të lartë të votave. Çaushi ka marrë 2810 vota deri tani në rang qarku, e po përballet me socialisten Bardho e cila ka fituar 3123 vota. Të dyja janë në pritje të vlerësimit së qytetarëve, por besohet se Çaushi do të marrë më shumë.
Sakaq, kujtojmë se asgjë nuk është e sigurt, pasi duhet pritur përfundimi i procesit të numërimit për të pasur një pasqyrë të plotë e të qartë për këtë qark.
“Deri tani, nga projeksioni i emrave si qark, nga 7 emrat të cilat do të futen në Parlamentin e ri, më shumë vota kanë marrë Klevis Jahaj, Elton Korreshi, Ceno Klosi, Antoneta Dhima, Zegjine Çaushi dhe Ilirjan Musko. Këto janë 7 emrat e deritanishëm. Por lista do të shtohet, janë edhe 200 kuti votimi që do numërohen në qarkun Fier dhe do të shohim cili do jetë trendi i emrave që do të marrin më shumë vota. Ajo që është e qartë, është se nga dy emrat të gjinisë femërore që do të fusë janë Antoneta Dhima dhe Zegjine Çaushi.
Por të ndalemi pak këtu. Zegjine Çaushi është duke numëruar vota me Maldrita Bardho, një tjetër kandidate e listës së hapur të PS. Deri tani, Maldrita Bardho ka më tepër vota se Zegjine Çaushi në 5 bashkitë e përfunduara. Maldrita Bardho është qytetare e Lushnjës, dhe vota ajo pret deri sa të dalë nga KZAZ të bashkisë së Fierit. Por, duke qenë se Zegjine Çaushi është kandidate dhe banore e zonës së Fierit, projeksioni mendohet se do ketë më tepër vota Zegjine Çaushi se sa Maldrita Bardho”, raporton gazetarja Tv Klan.
