Komisioni Qendror i Zgjedhjeve ka marrë pasditen e sotme vendimin për tu hequr mjetet e identifikimit të gjithë vëzhgësuesit në KZAZ-në nr.27 në Bashkinë e Vorës.
Ky vendim i KQZ-së erdhi pas përplasjes që deputeti i Partisë Demokratike, Flamur Noka pati me qytetarët dhe vëzhguesit politikë në këtë KZAZ. Përjashtim bëjnë vëzhguesit ndërkombëtarë dhe mediat.
KQZ bën me dije se ky vendim hynë në fuqi menjëherë.
Njoftimi i plotë i KQZ-së:
REVOKIMIN E AKREDITIMIT TË VËZHGUESVE TË KZAZ-SË NR. 27 BASHKIA VORË, QARKU TIRANË, PËR ZGJEDHJET PËR KUVEND, TË DATËS 11 MAJ 2025
Në mbështetje të neneve 6, 7, 19, pikat 1, shkronja “n”, dhe 2, të ligjit nr. 10019, datë 29.12.2008, “Kodi Zgjedhor i Republikës së Shqipërisë”, të ndryshuar dhe Vendimit nr. 23 date 1.2.2023, “Për procedurat dhe kriteret e akreditimit të vëzhguesve të subjekteve zgjedhore në komisionet e zonave të administrimit zgjedhor, komisionet e qendrave të votimit dhe vendet e numërimit të votave, në zgjedhje”,
VENDOS:
Revokimin e akreditimit të të gjithë vëzhguesve, për KZAZ-në nr. 27, Bashkia Vorë, Qarku Tiranë, të lëshuara për KZAZ-në, KQV-të dhe VNV-të, përveç vëzhguesve ndërkombëtar dhe mediave..
Ky vendim hyn në fuqi menjëherë dhe publikohet në faqen zyrtare të internetit të Komisionit Qendror të Zgjedhjeve.
Kundër këtij vendimi mund të bëhet ankim në Komisionin e Ankimimeve dhe Sanksioneve brenda 3 (tre) ditëve nga shpallja e tij.
