Rubrika me avokaten pasditen e kësaj të mërkure në emisionin “Rudina” në Tv Klan ndalet tek një temë shumë aktuale e shoqërisë sonë. Pas një divorci mes partnerëve, pesha më e madhe e gjithë kësaj rëndon mbi super e fëmijëve.
Dashur pas dashur konfliktet dhe mosmarrëveshjet nga njëra palë apo tjetër prekin në mënyrë direkte dhe disi të padrejtë interesin e fëmijëve. Prandaj në “Rudina” vjen rrëfimi i një gruaje e cila është divorcuar nga bashkëshorti i saj. Problemi qëndron se vajza e tyre kërkon që të studiojë jashtë, por ish-bashkëshorti i saj nuk e lejon këtë gjë dhe nuk firmos prokurën.
“Unë jam një nënë e divorcuar prej disa vite dhe nga martesa me ish-bashkëshortin kemi një vajzë që sot është 15 vjeçe. Vajza po mendon për të ardhmen e saj për shkollimin, por dëshira e saj është që ajo të largohet nga Shqipëria. Këtu qëndron edhe problemi jonë, vajza po insiston dhe po i lutet babait të saj që ajo të largohet dhe të vazhdojë studimet diku tjetër, por ai thotë që ne kemi vetëm një vajzë dhe nuk po e lejon këtë gjë. Nga ana ime vajza është e lejuar dhe nuk është aspak problem shkollimi i saj diku tjetër. Por, problemi qëndron tek ish-bashkëshorti i cili nuk po lejon këtë gjë dhe unë si nënë jam e stresuar dhe e merakosur për vajzën, e cila edhe ajo nuk po ndjehet mirë sepse nuk po i plotësohet një prej dëshirave të saj”, tregon nëna.
Lidhur me këtë rast konkret avokatja Margarita Kola tregoi zgjidhjen juridike, megjithëse se theksoi se fillimisht duhet të jetë mirëkuptimi njerëzor ai që duhet të mbizotërojë. Avokatja tha se çiftet nuk duhet të vendosin hakmarrjen dhe inatin që kanë me njëri-tjetrin që të prevalojë mbi interesat e fëmijës. Në rastet se njëri nga prindërit nuk firmos prokurën e fëmijës për të lëvizur jashtë atëherë është gjykata ajo që jep vendimin përfundimtar.
“Në fakt ligji nuk rregullon dot çdo moment të marrëdhënieve shoqërore, por rregullon ato pikat e dobëta të zinxhirit në marrëdhëniet shoqërore dhe të tjerat ia lë një lloj mirëkuptimi. Rastet kur prindërit nuk bien dakord është një rast tipik. Madje ka raste kur prindërit vazhdojnë që të jetojnë bashkë dhe përsëri nuk bien dakord për shkollimin e fëmijës. Në rastet kur nuk bien dakord dhe prindërit janë të divorcuar atëherë problemi është pak më i koklavitur nga ana ligjore sepse nëse fëmija do që të dalë jashtë kërkohet edhe prokura e prindit tjetër, pa të cilin nuk lëviz dot. Kjo prokurë është padiskutim e nevojshme në bazë të ligjit sepse fëmija nuk e kalon dot Republikën e Shqipërisë. Në këtë rast nëse njëri nga prindërit nuk lëshon prokurë atëherë shkohet në gjykatë dhe është e vetmja mundësi për të kërkuar autorizim për të lëvizur. Unë kam parë raste kur prindi nuk e lë fëmijën që të shkojë jashtë kur nëna siguron një punë jashtë. Në këtë rast i drejtohesh gjykatës, por nuk është e sigurt dhënia e autorizimit. Mirë është që të mos përfundojë në gjykatë për arsye se ne nuk e dimë vendimin e gjykatës, do e çmojë rast pas rasti”, shpjegoi avokatja.
Margarita Kola tregoi gjithashtu rastet më ekstreme, kur edhe në rastet e një emergjence shëndetësore nuk ka pasur një mirëkuptim për të firmosur prokurën në mënyrë që fëmija të lëvizë jashtë vendit, për të marrë shërbimin shëndetësor.
“Kemi dhe raste të mjekimeve. Unë kam raste ekstreme, kur prindi e di që fëmija do shkojë për t’u mjekuar jashtë, për të shfryrë inatin që ka me partnerin tjetër për ndarjen e martesës nuk i jep prokurë fëmijës që të lëvizë. Është një hakmarrje”, përfundoi avokatja.
Avokatja theksoi edhe një herë që në të tilla raste nuk është juridiksioni ai mund të japë zgjidhjen e shpejtë dhe të duhur. Pasi vendimi i gjykatës për prokurën ose autorizimin mund të jetë shumë vonë në raport me emergjencën e situatës./tvklan.al
